[港超] 中佬口水多過浪之 預算大屠殺

十二月田猛臣8

20220919_287b360cae3cfe4be271nyv3IEgMHtzo.jpg

20220919_d6b826cae9b97069bc38ZYWTAMWeEZ5K.jpg

                               
登錄/註冊後可看大圖

                               
登錄/註冊後可看大圖

前言/廢話︰
話咁快又兩個星期，今次又喺深水埗主場出擊，不過其實呢一場係第一週嘅補賽，因為之前傑志出外比賽返嚟要隔離，上星期在銀牌以5粒攪掂港會先係今季第一場正式比賽。
主隊︰兩星期前睇咗深水埗開季頭一場主場比賽，表現如果唔用「一無是處」嚟形容，應該都可以用「乏善足陳」！面對實力在中下游的港會，居然被人搶佔中場壓住踢，輸一球十二碼都只不過係對手弱，但今場主埸對手就係衛冕盟主傑志，上星期5粒炒港會，如果今場輸小過6粒都算唔錯。
客隊︰近幾季的擋台躉，但今季似乎都仲係要靠40歲的丹恩奴域，不過在本地聯實只要唔出大錯，應該都無問題。而今場基本上係季前熱身賽的強度，三分應該無乜問題，問題係要睇傑志會唔會咁早就盡量爭入多幾球。
比賽過程︰
上半場︰出場名單中，丹恩奴域暫列後備，不過唔好以為傑志係讓賽，因為今日天氣實在太熱，而且正選陣容之中，仲有艾力士、基爾頓，兩位前愉園中場查理史葛同米基爾，傑志應該無睇唔起深水埗，問題係究竟深水埗可以頂到幾耐呢？結果係2分鐘都唔夠，角球開出另一位前愉園球員潘沛軒一頂入網.....6分鐘後，又係角球，門前混戰中又係潘沛軒篤入，就係咁，10分鐘都唔夠，已經兩粒。
可能因為天氣太熱，之後傑志仲有攻，不過就唔算好急，而深水埗企定之後，都有返一兩次攻勢，其中深水埗21號曾經有一腳射門係中龍，只可惜完全無力，俾保羅沒收！去到22分鐘之時，今次就輪到艾力士射入，不過就越位食詐糊！當我以為深水埗可以守住落後兩球之時，大概36分鐘時艾力士就搏到十二碼，查理史葛面對舊隊友無失手，就咁就0:3！
下半場︰深水場都無乜可能反Cup，係睇輸幾多波！49查理史葛又遠射省中人改變方向得，之後55分鐘就由羅梓駿射入0:5。之後傑志並無留力，明加索夫同丹恩奴域後備落場，而剛剛丹恩奴域入場無耐，深水埗下半場先落場的4號又攞黃牌，由於之前已經有黃牌在身，所以依家就bye bye！
至於明加索夫同丹恩奴域亦有功課交，分別喺74同75分鐘入波！呢頭入到0:7，突然兩隊停晒走埋場邊，攪乜！？足球無得話輸到幾多提早結束比賽......
之後兩隊直頭入埋更衣室！PA亦即刻宣佈由於天氣關係，賽事暫停30分鐘！其實場上唔算好大雨，不過看台上有球迷話天文台發咗雷暴警告，所以一定要暫停！
停完30分鐘後，雨停咗，亦無行雷閃電，於是繼續打埋場波！深水埗打少一件之下，又無塞晒9個球員喺禁區入面擺鐵桶，當有機會反擊之時仍然會衝上去，而傑志就真係當季前熱身賽咁踢.....結果最後15分鐘入多3球(鄭展龍 78'，丹恩奴域 79'同米基爾 83')，結果以0:10完場！
入場人數：下半場公報有 1450人入場，以深水埗呢個場應該差唔多爆滿，當然應該唔少係傑志擁躉
全場最佳球員︰傑志2號羅梓駿，而深水埗就係喺進攻上有少少貢獻嘅21陳灝
總結：
中佬幾十歲人，成日串串貢話有咩波我未睇過？結果今場又刷新我睇波的紀錄！
問題1︰你睇過強者炒弱者10粒未？
未！
問題2︰你試過中途因為天氣，打打吓要暫停未？
未！
事前已經估到係一場強弱懸殊的比賽，不過估唔到2分鐘就頂唔住，同埋輸夠10粒。深水埗係一支年青球隊，而且亦無有經驗的外援協助，所以預算今季成績都唔會好得去邊！不過係唔係中佬就無嘢講呢？本來年青球員係要比機會同鼓勵，不過深水埗件4號中堅真係要講兩句！其實上一場佢一開波已經攞黃牌，後來港會積施利爆晒粗鬧佢，喺中佬印象中積施利都唔係好火爆的球員.....
今場波呢個4號下半場上場，潘教練好明顯係覺得上半場中路防死球唔掂，希望換個高啲入來穩住吓，點知佢入來幾分鐘就因為鬧球證而黃牌，之後一個粗嘢攔截就紅牌阿姑，入場只係20分鐘左右！唔單止完全幫唔到場上局面，自己出埋場再累到兵敗如山倒，打少個結果最後二十幾分鐘再失多5球！
因呢場大敗本來唔應該太過怪責深水埗球員，不過呢一件4號似乎真係唔夠班，再上場只係累隊友！
我哋以前成日笑啲友仔邊隊贏捧邊隊係「勝利球迷」，咁今季中佬轉會捧深水埗又算唔算係「失敗球迷」呢？
下一場主場比賽，10月16日15:00，對手係和富大埔！
2/9 つづく......