註冊論壇會員，發現更多精彩
您需要 登錄 才可以下載或查看，沒有賬號？立即注册
×
20230301_130ef1c11247c0fa90bd2xKFd4eVploI.jpg
20230301_84f095faa2a8b0c5bea0VbR1XQ7yqBvj.jpg
前言/廢話︰自從1月14日喺將軍澳運動場反客為主擊敗U23後，之後幾場比賽深水埗又出現故態復萌，對理文、晉峰同港會三場波，後防唔係出錯，就係對方入世界波，去到對港會一場，前鋒踢出今季組織最好一場，點知又主柱又中楣，再唔係就俾狀態大勇費查左飛右撲，全部救晒！
好唔容易呢一場終於又到對U23，但唔好以為U23就食硬，上次都差少少臨尾香被追和！對於U23嚟講，今季有無機會贏波，最好機會就係喺深水埗身上搶分，講衰句大家都係揸住個乞兒兜，大家都想喺對方個兜攞飯食！
門票︰正價80蚊，中佬本身係季票會員，所以今場係包在季票之內。
上半場︰
一入場竟然發現深水埗打氣區內，「港超名人」俊立竟然在場！佢唔駛去跑馬地撐傑志咩？上次見佢又係對U23喎！我淨係聽聞佢同理文有啲恩怨，乜同U23又有過節？
一開波深水埗就憑主場球迷打氣之下，經過兩三場磨合之後，深水埗前線開始同朱偉鈞有較好合作，一開波就傳個波去前面由朱偉鈞去帶動進攻，開波無耐就迫到一個角球，開出角球就比朱偉鈞接應頂入，估唔到7分鐘都唔夠，深水埗就攻入今季主場第一個入球，亦都係朱偉鈞加入深水埗後第一個入球！
咁早就領先，深水埗當然希望乘勝追擊，三分鐘後又係朱偉鈞喺左邊攪攪陣，禁區內出個波去尾柱，劉浩霖接應勁射緊緊越楣而去，可惜未能拉開紀錄。之後深水埗仲有幾個機會，朱偉鈞試過頂中龍被龍門接住，羅港威亦試過射門柱邊出界，但始終未能入到第二球。
而U23今日當然都係求勝心切，但係實力有限所以唔算好有威脅，不過唔知係咪壓力太大，班小朋友好似愈踢愈燥，上半場好明顯U23同深水埗爭波之時，「唔收腳」同「毛手毛腳」次數都非常多，而且今日個球証對呢啲小動作走漏眼的比率非常高！中佬覺得球証唔係偏幫U23，而係佢真係睇漏，由於U23超技術較多，所以深水埗球迷都非常不滿，如果下半場尾段仲係咬住拉唔開，大家心急下去得更盡，球証又做唔到明察秋毫，分分鐘會引致「開片」都唔奇！
中場時段，今日深水埗安排咗女子跳舞團體vaslav表演，下半場開波之後，班女仔走上看台搵停賽嘅捷西斯合照，之後仲好似交換IG......喂！捷西斯，你咁做對得住下面拚搏緊嘅兄弟咩！？
下半場：
開波後兩方維持上半場後段嘅節奏，U23組織唔到，深水埗亦唔可以拉開比數！去到55分鐘之時，U23終於組織到攻勢，傳到去左面7號殺入禁區起腳射地波攞遠柱，好在俾奧力斯飛盡救出，而尾柱位置U23亦無人執雞，算係有驚無險！之後深水埗後防仲有一次「出沖」，波比解圍之時踢空氣俾U23球員截到入禁區，不過今次其他球員好集中，好快就補返位，最後U23 9號只可以射出一腳無力嘅地波出底線！
至於深水埗，下半場中場形勢仲係比較好，但組織唔到有威脅嘅攻勢，而且可能領先下傾向保守，而且U23亦愈踢愈辣，再加球証又成日睇漏，肉酸嘅攔截又唔俾牌，深水埗有得益之時又吹返轉頭，難怪在場球迷不停大叫「垃圾球証」，事實係今個球証烏龍度係中佬今季入場見的最差一位！
雖然只係領先一粒，但好明顯U23想追和都可以講係力有不隸，點知去到將近完場之時，竟然發生「嚇到腳軟」一幕，右後衛(唔想講名)解圍一個威脅唔大嘅波時，居然禁區內撻Q省返落自己隻手！當時中佬同看台上其他深水埗球迷，心入面應該都係諗住「X街喇！」呢幾個字！點知望一望球証，好似無咩反應......不由自主諗︰「VAR呢？」！咪住！港超邊有VAR！？見到U23啲球員雖然有舉手，但見個球証好似睇唔到，唯有繼續追波，之後個波過咗前場，我哋先定返少少！
最後，補時四分鐘後，深水埗再次喺「難弟」身上住取三分。
入場人數：711人，可能因為今日攪咗嘉年華，派咗啲飛俾街坊。不過其實今季雖然成績唔太理想，但係仍有唔少街坊入場支持！
總結︰
其實呢場波嘅總結本來唔多，主要係主場嘅深水埗早早開咗紀錄，之後一直拉唔開比分，而U23實力亦都有限，即使捉到深水埗「出沖」，但亦都把握唔到，入波之後雙方就係膠著嘅狀況，所以最後戰程同戰果都算係合理！雖然深水埗本身整體係高少少，但係又唔足以去到「輾壓」對手嘅地步！
不過今日中佬真係有啲意難平，點都要講吓U23……
其實中佬都明白，當成隊人都係U23之時，根本無一啲所謂老大哥可以陣住個局面，而且成績又唔好，球員心理點都有壓力，無人想一季都輸晒！但今日U23嘅表現就真係令中佬失望，比起幾個星期前主場嘅比賽，U23今場唔單止可以講係茅，直頭令我覺得相當辣撻，大家都走去追波之時，今日U23好多球員吓吓鞋底去先，明明個波都拍咗出界，仲要唔收腳「印」落對手度，一係個波離開晒又要抽水踢多對手一腳，呢啲行為既肉酸，亦都幫唔到U23贏波！
最離譜仲係下半場，深水埗11號黃靖揚同U23 7號跳起鬥頂，點知7嘅條XY根本係「要人唔要波」，立心跳上去「浪」黃靖揚，結果黃靖揚半空失重心成個人「撻生魚」咁撻落地！
阿7號︰踢波唔係咁踢，想贏波亦都唔係用埋呢啲辣撻招，今日黃靖揚最後無事起返身係你好彩，一個唔該跌落嚟嘅吓頭或頸落先，分分鐘可以傷得好重！
最後，我終於發現邊個先係深水埗嘅「幸運之神」，原來係——俊立！
下一場主場聯賽比賽，2023年3月12日15:00，對手係冠忠南區
14/17 つづく......
[ 本帖最後由 十二月田猛臣 於 2023-3-1 21:42 編輯 ]
| 
發表於 2006-11-29 03:09
/3 