[中超] 中佬口水多過浪之 全華班．等降班

十二月田猛臣8

                               
登錄/註冊後可看大圖

20230702_070d6ef830546a354bc1KxLcB4XImJso.jpg

20230702_59858a484c43a777ea945keDVAbVPEoK.jpg

                               
登錄/註冊後可看大圖

20230702_371668ca916343a2028ccpdFf5Vj8Sc5.jpg

廢話︰
去完韓國返嚟，正所謂財散人安樂，不過正常娛樂仍然係要有，不過港超放暑假，咁唯有北上，中超好在無暑假！
.
門票︰仍然係分80蚊同120蚊兩種，但現場係唔接受現金，上一次對梅州就係因為中佬無電子支付買唔到飛而白行一趟！至於今次中佬就帶埋老虎入場，老虎大人有國內支付系統，最後成功俾錢！
對賽隊伍：
深圳︰由舊年下半季開始出現拖糧狀況，捱到今時已經唔易，相信深圳市政府都出唔少力，只好講中國足球的老千太多，做老闆好難唔心灰意冷。
.
成都蓉城︰上一年嘅升班馬，今年仍然維持唔錯嘅表現，雖然中佬估計佢攞唔到冠軍，不過有機會可以攞到前三。前恆大「國腳」艾傑臣、前建業「大茅柴」周定洋同富力「三水哥」唐沒淼係小數中佬認識嘅球員。
.
比賽過程︰
上半場︰開波前公佈雙方陣容......深圳一個外援都無，不論係亞歷山德里尼定係阿奇姆彭，正選同後備都唔見人！大鑊！全華班！而成都就全力出擊，而且一般中超都係容許三個外援同時上場，成都基本上係五鬼拍門(三名援再加艾傑臣同周定洋)。身旁嘅老虎跟咗中佬咁多年仲係唔識足球，不過佢第一句意見係︰成都啲人好大隻，深圳啲人瘦好多，係咪好後生的青年軍.......
就係唔識，都睇得出兩方有啲距離，雖然開波1分鐘深圳就有一波無力攻門，但之後就係完全攻防戰，無埋阿奇姆彭，即係反擊都唔駛打！
而成都前面3鬼，除咗艾傑臣之外，仲有兩個7號同21號，兩個都非常大隻，而中場有周定洋，後防有另一位40號外援，基本上呢個排陣，對全華球深圳基本上係有贏無輸，果然開波之後就壓住深圳半場嚟攻，深圳無奈之下只可以10 0 0鐵桶陣對抗。而成都基本上係集中右路由7號做重心，靠佢「步大力雄」發動攻勢，5分鐘已經有一腳射門要魏黽哲飛身救出，之後時間基本上都成都仕攻，係睇吓可以頂到幾耐，守唔守得住半場？
結果29分鐘時，成都開出角球，禁區內彈來彈去，最尾俾成都5號射一腳彈中楣底入網，成都領先一球！
領先之下成都你急我唔急，而深圳亦都無本錢去打反擊，最後十幾分鐘成都可以輕鬆猜波拖吓時間，好快又消耗埋上半場。
下半場︰開波之後雙方都係維持「成攻深守」局面，可能深圳都希望維持落行一球，最後時段先壓上去搏一分，點知人算不如大算，49分鐘之時「三水哥」唐淼罕有殺入深圳禁區，個波跌跌撞撞之下佢起腳射一腳唔算太勁嘅波，點知魏黽哲居然手腳之間漏咗個波入網，就咁成都就領先到兩粒！
之後時間深圳都換入其他球員，不過由於質數問題，實際上產生威脅唔大，只係靠一啲罰球同反擊希望搵到食，只可惜成都後防件40號相對穩健，單對單根本就過唔到佢，更加唔好講威脅守門員。
在場深圳球迷當然希望可以最少入返一球，不過大部份球迷其實都心中有數，甚至去到最後十分鐘，深圳主場球迷區都停咗唔打氣！老老實實，中佬覺得今年做深圳球迷比起做深水埗球迷更加無可奈何，季初仲有一度氣，點都同對手拚一拚，而呢一場對成都可以講係中佬睇深圳隊以來最無力一場！
最後去到82分鐘，唐淼右路傳中，21號頂入，成都領先去三球，而以下比賽時間都係垃圾時間，大家捱埋佢完場。
總結︰就喺呢場比賽之前，深圳同成都各自打咗一場足協杯比賽，對手都係中乙球隊，由於賽例規定唔可以用外援，結果兩隊都比中乙對手淘汰！証明喺中超賽場上面，有外援同無外援分別好大！
我唔知係今場一個外援都無上，係因為有傷？無糧出走咗？定係留力下星期一，留力打近況都係好差嘅武漢三鎮！
賽程去到差不多一半，依家深圳距離降班位置只係多3分，非常唔樂觀，當然中超下游好多隊波狀況都唔好得幾多，希望今年深圳隊可以護級成功！除咗中佬希望下一季可以繼續喺深圳睇中超之外，希都希望深圳市政府啲錢唔好掟落鹹水海.....何解？因為網上新聞，深圳體育場改建工程如火如荼，完成後將會係一個可以坐四萬五千人嘅專業足球場，預算今年底完成！
如果有一個專業足球場，無專業足球隊你話幾大鑊！
.
如無意外下一場入場睇深圳隊，會係8月19日對南通支雲，不過中間仲有其他攪作，到時見！

garywwfan8

中佬，來緊星期六對南通會唔會去睇呀？去既你pm 我呀，不過我自己都會去

十二月田猛臣8

去！不過仲未公佈喺邊個場踢！