[中超] 中佬口水多過浪之 可能係今季最後一場入場睇中超

十二月田猛臣8

20230824_2477e285ab025121738aZXxvWkdJOqNU.jpg

                               
登錄/註冊後可看大圖

                               
登錄/註冊後可看大圖

20230824_4e93ab90dd35a7b4e947RQVzPDMKv1JF.jpg

廢話︰
星洲回來之後，主要係忙於工作，當然工作還工作，娛樂節目都係需要嘅！港超未開波之前，近近哋中超成為唯一選擇，不過好衰唔衰，又撞正深圳隊連續多場作客，要去到8月19日先再返主場。
呢場波由大運場搬咗去寶體，呢一個對中佬當然係一個好消息！雖然兩個場距離關口都有一定距離，但係寶體附近有壹方城呢個中佬最鐘意去嘅深圳商場，仲有Aeon同Walmart呢一類超市，睇波前後都可以行吓，食嘢亦方便，唔似大運附近得一間細細嘅華潤萬家！
再加上8月19日呢一日港鐵大發慈悲，全線半價，連北上都可以，咁就幫我慳返40蚊，所以呢一場波當然會上去睇！ 
.
門票︰寶體主場係分80蚊，120蚊同200蚊VIP票三種，不過今次深圳隊賽前公佈現場唔會賣飛，所有人要睇波就喺「大麥網」用手機自己攪！睇場波都要攪咁多？又要電子支付又要實名認證？好Q煩啫！我睇場波咋！
最後中佬決定搏一舖，如果去到現場有黃牛，就唔驚無飛同唔收現金，如果真係一張飛都無，咪當行街，去壹方城食個「小楊」之後返香港囉！
中佬經羅湖過關，之後去商業城交啲嘢俾老虎嘅朋友，上到地鐵都已經1530，去到寶體之時已經1630，出站後就望一望有無黃牛，去到大門前球迷會已經擺好檔，不過可能距離開波仲有成三個鐘，見唔到黃牛！於是中佬就去咗Walmart、Aeon同壹方城行個圈，唔知點解今日壹方城勁多人！行到1800左右，就行返去寶體，今次就見到有黃牛，第一個女人同我開150，我就再睇睇先，之後有個阿叔同我開100，係面價120的位置，是但喇！就咁成交！一攞張一百蚊出來......
阿叔問︰香港人？ 
中佬︰…….好眼光！ 
對賽隊伍：
深圳︰據講8月頭深圳隊終於籌到一啲資金出咗一期糧，而且外援瓦卡索亦都趁7月轉會窗歸隊，只可惜唔係個個球員都有耐性等落去，好幾位華人球員同時間都離開咗深圳隊。另外隊長阿奇姆彭因為種族歧視而引發暴力事件而要停實4場，令到本來已經疲弱攻力雪上加霜，即使亞歷山德里尼復出都幫助唔大，自從5月尾戲劇性返cup梅州之後，只係打和過天津攞得1分......
.
南通支雲︰對呢隊波唯一印象係佢成日都發公告話要同「惡勢力鬥爭」，成日自封住苦主！去到呢一輪比賽前係尾二，實力都係相當有限！ 
.
比賽過程︰
上半場︰一開波估唔到南通就反客為主，主動去攻深圳，而深圳方面就排出一個比較保守嘅陣，進攻就由亞歷山德里尼負責，配合沈子貴等幾位小將，而瓦卡索就負責防守，不過唔知係因為天氣太過悶熱關係，瓦卡索即使截到個波，都唔會殺上前，而係交返俾亞歷山德里尼去組織，自己返而退去後場防守。
12分鐘之時，南通就有一腳有威脅嘅射門，25號禁區外起腳，雖然夠勁，但太正被今場正選出場嘅董春雨托出底線。
當然，雖然南通係壓住深圳嚟踢，不過今季依家佢哋都係尾二，實力亦都係「有限公司」，似乎戰術上佢哋想外11號外援前鋒去做一個進攻重心，睇咗一陣之後發現南通呢位11號係屬卡「步大力雄」一類前鋒，不過技術就相對粗糙，以深圳擺出鐵桶陣，無太大空位俾佢去「爆」，發揮就有限！
至於深圳方面亦都踢得好保守，進攻線出現失誤亦都十分多，靠沈子貴同鄭達倫喺兩翼亦都無乜功效，最後半場就咁就悶和0:0完場！ 
.
下半場︰
開波後仍然維持住上半場嘅戰局，南通表面佔優，但亦都無太大破門板斧，而幾位外援雖然有身型，但對住深圳鐵桶陣亦都破門乏力。只可惜同樣深圳都係只顧穩守，可能今日目標只係1分，但以目前護級形勢，同南通打和只係「攬炒」，對實際幫助唔大！
50分鐘之時，南通又有一腳近榜嘅射門，16嘅禁區內射門，又俾董春雨救出！只可惜1分嘅如意算盤都打唔響，去到69分鐘，南通終於捕捉到深圳後防失誤，首先係11號終於爆開咗深圳右後防，喺左路出波去禁區頂，喺禁區邊位置兩隊混戰之下，深圳未能成功解圍，最後人堆中南通44號抽入，南通領先0:1！就如同我一齊上去嘅版友講，如果南通入波先，贏波機會好高！
落後一球之後，深圳無可奈可地再反擊，不過可能今日天氣酷熱無風，深圳隊都明顯有啲力不從心！下半場去到後段都見唔到深圳有強組織同反擊能力，雖然都換咗好幾位後備球員入嚟，但都無明顯改善。稍為有威脅嘅射門係75分鐘，後備入替嘅34號一腳地波直飛左下角，需要南通守門員撲出。
去到補時階段，深圳終於有全場最「黃金」嘅機會，罰球右路斬中，後備入替嘅33號搶點頂到，只可惜南通有後衛力壓之下，個波頂得太正兼無力，被南通守門員接實！
最後6分鐘補時話咁快就過，場雞一吹完場，深圳又輸一場！ 
入場人數：8347人
.
總結︰雖然話今個月出咗一期糧，而且外援都肯上陣，不過呢場波最後係連包尾二嘅南通都輸埋，今季可以護級嘅機會愈來愈低！其實今場真係名副其實嘅「海軍對水手」，如果唔係兩隊都唔會位置包尾同尾二！南通基本上成場係壓住深圳嚟打，不過有機會入波機會又唔係太多，正如同中佬同行的版友睇到下半場都話︰呢兩隊波水平唔高，傑志應該可以贏呢兩隊！而且今日呢場波其實都幾悶，都係中場混戰多！ 
呢一場可能會係今季，甚至未來一段時間最後一場入場睇嘅中超！雖然之後仲有好幾場主場比賽，但多多少少都見到依家深圳隊嗰一種有心無力嘅狀況，稍為有質素嘅球員已經唔再得等，淨返之後可能都係三個外援帶住一班青年軍，嚟緊賽程都唔會輕鬆，主場比賽就更加難打！連南通都輸埋，總唔可能贏山東同北京！ 
老老實實，今場波人腳同季初之時差好遠，雖然話有返兩個外援，但有人質素的華人球員已經走得七七八八，淨返啲青年軍，想拼搏但係技術同體能都唔合格，可以產生作用唔大！下一場星期日嘅主場比賽已經要去到9月24日對淅江，雖然無同深水埗嘅比賽撞期，不過如果場場表現都有心無力，輸波捧蛋完場，中佬入場嘅意慾就唔高！ 
究竟下一季中超仲有無比賽喺深圳踢，甚至依家呢一隊深圳隊會唔會直接解散，就要季後先王知道！
至於另一支降班隊伍，南通同大連都係難兄難弟，仲未睇到邊隊可以逃出生天！
[ 本帖最後由 十二月田猛臣 於 2023-8-24 21:38 編輯 ]