[港超] 中佬口水多過浪之 今年仍然做唔成「架兩」

十二月田猛臣8

20240526_e710b57fcc77fdd9252fKRs4snTxad4S.jpg

                               
登錄/註冊後可看大圖

                               
登錄/註冊後可看大圖

20240526_c615fbc51aa3b4ad879fWAMDU8hmzRr1.jpg

前言/廢話︰上星期香港仔運動場見證咗足總杯深水埗爆冷將聯賽「領頭羊」理文踢出局，當時當然係睇到血脈沸騰！八日之後，又再回歸聯賽，呢一場係深水埗今季主場嘅「謝幕戰」，對手又咁啱又係理文！
呢一場波獨特之處係，理文只要喺深水埗場不敗，最少攞一分，就可以首次成為2023~24香港超級聯賽嘅冠軍！作為一支商業球隊，相信都係一個里程碑。整體上理文今季發揮算係穩定，聯賽對下游球隊好少失手......不過，上星期就失過一次手俾深水埗！
賽前有人就提出「理文自爆論」，即使係大好形勢之下，如果理文再次俾深水埗擊敗，之後5月26日又輸埋俾傑志三球或以上，結果就會成為「完美自爆」！
咁啱咁橋，連續兩季理文最尾兩場比賽都係先對深水埗再對傑志，如果傑志希望仲有一線生機，深水埗又要飾演「架兩」呢個角色，至於做唔做到就......反正上個星期都做咗一次，凡事都有可能！
.
門票︰正價100蚊，的確係加咗價，據我所知當日係一併向足總提交對傑志同理文比賽調整票價申請，當時係唔知理文會有機會喺深水埗場「封王」！當然。中佬身為「成人通行證」季票會員，主場港超比賽已包在內，所以今場波不受影響。
上半場︰賽前公佈陣容，拿亞後備？後來知道原來同累積黃牌有關，當然係足總杯決賽緊要！不過無咗拿亞，宋柱浩同小田倉康太頂唔頂得住安尼亞，呢個係中佬擔心嘅問題！而理文方面我本身唔太熟佢陣容，不過正選陣容唔見咗保利臣。
果然一開波，理文就立即採取主動，雖然話一分就夠攞聯賽冠軍，不過似乎佢哋想由足總杯四強出局後盡快「回彈」，所以一開波就唔理咁多谷上去，而且好明顯係針對深水埗後防無咗拿亞，今日理文好明顯多咗用安尼亞做一個進攻重心！
理文去到17分鐘終於有斬獲，艾華頓射門中柱彈出，安尼亞執雞射入，不過同一時間球証收到通知，入球有問題！VAR檢查之下判入球無效！知道入球無效之後，安尼亞十分火滾，大聲抗議之下攞咗黃牌！某情度上都反映理文球員壓力相當大！
不過「過得初一過唔到十五」，25分鐘時禁區頂擾攘一輪，最後安尼亞勁抽遠柱入網，理文終於打開紀錄！三分鐘之後理文乘勝追擊，又係安尼亞禁區內勁射已經被梁興傑救出，不過接唔住個波，被安尼亞衝前篤入，成0:2！去到呢一刻，理文呢個冠軍應該無走雞！
.
下半場：中圈再開之後，可能之前壓力太大，所以理文都唔理咁多，仍然當0:0咁踢！至於深水埗可能受到足總杯決賽嘅「後顧之憂」，感覺同上個星期去盡搏命嘅感覺唔同咗，有些少怕傷怕黃/紅牌！而且佢哋又無刻意去打901，結果成個下半場就好似睇緊一場「不痛不癢」嘅練習賽，於是理文有啲復仇心態下，分別喺49(基華尼頓)、56(亞哥斯達)、77(鄭兆均)同84分鐘(李毅凱) 頂/射入。
輸到0:6，其實跟住落嚟都可以算係垃圾時間，不過今日就有少少意外，去到85分鐘之時，深水埗佢然喺右路進攻，陳灝「左武右武」，突然間嚟一腳「天外飛仙」，更加意外嘅係個波射得好靚，中內柱入網！雖然呢一球對成場波最後結果係無任何影響，不過作為今季最後一場主場比賽，雖然係比理文大炒，但都入返球唔好捧蛋，算係對我哋主隊球迷有交代！
最後補時後，長雞一吹，理文不單以1:6擊敗深水埗，喺仲有一輛比賽下，亦以領先6分而提早一輪奪得23~24香港超級聯賽冠軍。可能今日事前有打咗招呼，賽後足總啲工作人員「罕有」地無催我哋收拾，而理文那一邊當然係慶祝！
.
入場人數：1633人，真係破咗呢兩季以來，深水埗最多入場人次，呢一日個場面都幾誇張，首先係不停見有觀眾入場，甚至係開波後十五分鐘仍然有人入場！另外平時一般幾百人入場都會坐得唔太密，但今日上排座位基本上係爆晒，好在中佬係坐返喺打深水埗打氣區，唔係位都無。
當然今日有咁多觀眾入場，當中唔少人係因為想睇理文封王，好多觀眾係著住理文波衫！雖然係對家球迷，但中佬對於有咁多人入場都係覺得開心！係以整個香港足球嚟講，都係值得高興！尤記得舊年又係尾二一場，又係理文對深水埗，當時狀況係如果理文攞唔到三分，就同冠軍無緣，雖然深水埗唔係咩強對手，但一場都算係關鍵嘅比賽，再加上係主場謝幕戰，居然只係得四百幾人，真係有啲少！幸好今場就比較似樣！
全場最佳球員︰理文射入兩球嘅安尼亞。
.
總結︰無可否認，今日呢一場比賽算係一場大敗，作為23~24年度最後一場主場，結果的確係有啲傷感，但考慮到兩隊波各自有唔同嘅心態......深水埗目標係足總杯決賽，而理文本來攞一分就夠封王，就反映咗同上星期完全相反嘅心態！
拿亞唔出，用小田倉縮後踢中堅，完全係牽一髮動全身，無咗拿亞，安尼亞就有更大嘅活動空間同體型優勢，而中場少咗小田倉，好明顯截擊力下降，所以大敗亦都有原因。
至於理文，今日本身同吹晒雞，由會長至球迷都熱切祈待可以攞三分順利封王，以免夜長夢多！而且理文會長亦都開口，以「好肉酸」嚟形容上星期足總杯出局，所以今日球員同教練都高度緊張，除咗三分之外，仲要有一場壓倒性嘅勝仗，先可以抬返起個頭。
此消彼長之下，輸亦係合理，安慰點係陳灝都入返一球世界波，算係為今季最後一場主場比賽攞返少少面子！
.
今年所有聯賽主場比賽已經結束，但球季仲未完，仲有一場作客聯賽對港會，當然重頭戲係剎科戰，足總杯決賽對東方！
.
16/16 つづく......