註冊論壇會員，發現更多精彩
您需要 登錄 才可以下載或查看，沒有賬號？立即注册
×
20250405_3122afaeec2642284c00AwrqNKkitJGu.jpg
20250405_5801b20323317586d1acMAJAlcuyJgUF.jpg
20250405_1a5463301fc3c173a470QaoKmYnc0MF4.jpg
20250405_e004c1042ae23270970aj0UvfDzVqFJ2.jpg
20250405_0dceb6a7ec6a75702e04VCBYV0FV686L.jpg
20250405_c36a1e6a3d69fd926d58si4J41dONUhI.jpg
20250405_02627e8cd111d50643abyTCQLeeHuJ5a.jpg
廢話︰自從深圳有中超球隊之後，中佬都算經常北上睇波，除咗2023因為有深水埗嘅比賽之外，每一季主場揭幕戰同剎科戰我都會出現！眨吓眼舊年剎科護級戰影像仍然清晰，但新嘅一季嘅中超已經又嚟喇！
.
門票︰呢一場係2025賽季新鵬城嘅第一場主場，更加係深圳體育場經歷五年翻新，由綜合體育場改建成為專業足球場後，正式嘅揭幕戰！喺呢一個雙重「頭炮」之下，新鵬城最希望當然係高朋滿座，汲取舊年剎科戰嘅經驗，想多人入場，最簡單直接嘅方法就係減價！結果比賽前一星期宣佈︰全場位位80蚊人仔！
今年同舊年一樣，實體飛已經絕跡，電子飛就由舊年嘅票星球，改為看個比賽。而本身新鵬城自己嘅小程序都可以買飛，到場就用Home Return Card入場！
.
對賽隊伍：
深圳新鵬城︰今年喺新鵬城第二年落戶深圳，相比舊年因為亞洲杯關係，臨急臨忙先搬到深圳，今年似乎準備功夫比舊年好啲，開始有周邊產品賣，作為一支商業球隊，對於增加收入同凝聚球迷係必要嘅！
球員方面，除咗上季原有班底，好似係杜加里奇，卡爾采夫、艾度加西亞、利安高等外援之外，今季仲加入了一位奧地利國腳薩卡利亞，五名外援前中後成為骨幹，當然仲有港腳安永住，國腳拜合拉木，再加入中佬偶像老將姜至鵬！其中喺一月嘅省港杯之中，中佬同廣大香港球迷，仲趁近距離時，向姜至鵬同拜合拉木送上「最真誠」嘅問候同祝福！
有加就有減，去季下半季以借用身份加入新鵬城，有「中國核心」之稱嘅神鵰俠，今季就無再續借，返去原屬球會！只可惜季初集訓受重傷，如無意外今季都報銷！我當初仲估計新鵬城唔再續租借，以佢嘅身手，大可以借去今季升上中甲嘅深圳青年人，好似當年郜林同鄭智以當紅國腳身份帶領恆大「衝超」！Anyway……
唔知係因為深圳主辦U20 亞洲杯關係，今季頭兩輛比賽都係作客，成績係一勝一負，輸俾上港，贏海牛！
雲南玉昆︰久違唔知幾多年，再次有「山高王帝遠」球隊升上中超，上次有雲南地方球隊，印象中係雲南紅塔！主教練前香港隊教練安達臣，前理文左後衛兼港腳徐宏傑係玉昆熟識嘅名字！開季暫時一和一負，成績比新鵬城低少少，不過季初波，大家都係摸索階段，好難講邊隊高啲！
深圳體育場︰
上一次喺呢度睇波，係2018年中甲剎科戰，當日深圳佳兆業喺呢度炒起浙江毅騰衝超！事過境遷，兩隊波都已經不在！而呢幾年間，深圳體育場作大規模升級改造，成為一個專業足球場。
而交通方面，由香港出發最方便係經福田口岸，出咗入境大樓之後過停車場嗰邊搭地鐵10號線，由福田口岸到崗夏北，再轉14號線黃木崗落車，最近係7號出口上地面就到！
依家入場同舊年一樣，都係俾張Home Return Card佢scan吓，之後拍沙龍，今次就有出一張白色收條，提示邊一個區同座位！
入到場之後，新翻效果唔錯，而且可能因為未來幾年都會留喺呢個場，新鵬城都加入咗一啲固定店舖去賣紀念品同飲品！本來中佬今日係準備咗買返件球迷衫，不過由於今日收工到呢度有啲趕，而且排隊嘅人都好多，唯有放棄！
上到看台......嘩！改造效果好好，喺4字頭區域望落去居高臨下，望到好清楚！由於今日係夜波，所以當然無「西斜」問題，綜合感覺唔會比首爾世界盃球場差！不過如果一年只係打15場波，就真係有啲浪費！
題外話︰呢一頭本身唔算旺，喺6號出口上地面有一個小區，小區入面有一個細商場，有一間老麥，不過規模唔算大，如果有一百幾十人排隊時恐怕佢做唔切！
比賽過程︰
上半場︰
開波之後，憑住主場氣勢，新鵬城先佔主導位置，而作客嘅雲南就先穩守。
去到10分鐘，就嚟到呢一場波嘅「缺口位」，雲南攻擊球員喺禁區頂爭持中有碰撞，本來球証已經吹罰咗新鵬城俾一個罰球雲南，不過雲南球員就圍球証表示係禁區內，而VAR房亦通知球証要睇片！最後球証睇完片後確認，犯規地點喺禁區之內，所以判一個十二碼俾雲南！開波無耐又輸一球無謂嘅十二碼，真係幾無奈！雲南十二碼由25號黑人前鋒操刀，但呢一腳十二碼認真射得差，完全無角度俾趙石擋出，只可惜撲唔到向橫邊，直接反彈返中間，25號立即上前補中......就係咁，雲南作客領先一球！
可能因為今季主場第一擊，新鵬城壓力都比較大，落後之下就想壓出啲盡快收復失地，點知愈心急愈見鬼，去到23分鐘俾雲南打個反擊，25號單刀推進，之前球十二碼就射得好肉酸，不過今次佢就做返場好戲，雖然趙石出迎已經封咗位，但仍然俾25號射遠柱入網成0︰2！
就係咁，雲南兩次攻擊，「高效」地入咗兩粒！
開波之後深圳立即加油撳住雲南嚟打，25分鐘差小小就有收穫，利安高中路突破連龍門都過埋，只可以最後一腳俾雲南後防護到空門，仍未可以追返一球！
之後新鵬城壓住雲南嚟打，不過心理上雲南就著數好多，而且當雲南屯重兵喺後面，新鵬城只係佔數字上嘅優勢！去到26分鐘，雲南又打一個反擊，右面傳中，又俾25號撞入......好彩呢個時間旁証舉旗示意越位！再組VAR覆核，確認越位之下，新鵬城真係執返身彩，如果真係輸到三球就真係無眼睇！
去到32分鐘，新鵬城終於迎嚟主場嘅第一個入球，雲南走漏咗後上嘅艾度加西亞，被佢射成1︰2。
呢幾分鐘雙方都係「拳來腳往」，相當刺激！不過呢8分鐘嘅「轉速」實在太快，兩隊唔可能90分鐘都咁高壓，尤其係新鵬城追返一球之後，大家都會縮一縮再去吼入下一球波嘅機會！所以跟住嘅時間大家都無特別黃金嘅機會，半場完新鵬城落後1︰2。
半場休息︰新鵬城都學咗外國，半場之時用長鏡頭，將球迷個球樣再加AI卡通化，投影到LED大螢幕上！
下半場︰
雖然半場落後一球，不過新鵬城上半場發揮都唔算太差，雲南亦都創造唔到太多機會，只不過把握力較好，可以入兩球！下半場一開波新鵬城就開始攻，唔到兩分鐘竟然有收穫！46分鐘，個波罰球斬入到禁區時，二傳後俾埋伏喺尾柱嘅艾度加西亞半腰波頂入，估唔到咁快就有追平！
當深圳追平之後，現場球迷當然更祈待新鵬城可以上演反cup，點知唔夠幾分鐘，雲南又再領先！50分鐘，雲南嘅10號禁區頂起腳，唔知趙石係喺咪人遮咗視線，完全係喺可以撲救範圍之內，俾個波落地入咗！就係咁，雲南又再領先3︰2！
再次落後都無辦法，之後時間新鵬城都唔係無機會追平甚至反超，52分鐘時，張曉彬已經有一腳中龍射門，隨後角球開出，隊長杜加里奇近門頂中龍，點知兩次都俾雲南守門員救出！56分鐘右路傳中，利安高力壓對方中堅射門，點知兩次都俾雲南嘅守門員近距離撲出！
幾次追唔和之下，安永佳同卡爾采夫都後備入場，之後連拜合拉木都調埋入嚟，點知去到80分鐘雲南又再擴大比分，今次又係新鵬城後防失誤！杜加里奇頭球解圍唔到，去到左邊俾雲南3號號截刑，佢亦唔客氣推一吓就立即起腳，地波射入成2:4！由於下半場深圳龍門後方就要球迷區，所以當雲南再入波之時，雖然係就地慶祝，無特別挑釁主場球迷，不過都有幾杯飲品掟入球場！慶祝完之後，中佬望望雲南呢件3號......點解好似咁熟面口？呀！！！徐宏傑！
83分鐘時，新鵬城一個角球攻勢，楊一鳴攻門時個波省雲南4號改變方向入網，擺咗個老烏！新鵬地追到3:4又有返攞分嘅機會，不過呢個時間又出事！當新鵬城入第三球之後，新鵬城球員就搶個波準備快去開波，而雲南球員就梗係攞住波阻頭阻勢，混亂中有個雲南球員「典地」，兩方又發生推撞！最後VAR房call球証，球証睇完VAR後，先俾一個黃牌雲南4號，應該係阻開波！不過更大鑊係VAR確認拜合拉木爭波時有出手濕咗對手一拳，結果出場幾分鐘就紅牌出場！
大鐘到90分鐘時PA宣佈︰下半場補時15分鐘！呀！！！中佬印象中從未睇過一場波補15分鐘咁多！當然亦都係正常，下半場幾鑊VAR，再加上雲南班友都係「專業演員」，拖咁多補15分鐘都唔多！
落後一粒，又打少一個，深圳唯有推杜加里奇上去踢前鋒拍住阿佳，卡爾采夫就留返後少少！不過去到補時，全場表現最好嘅姜至鵬同艾度加西亞都已經七七八八，唔少上半場可以造到咁多攻擊！而雲南又唔完全係守，有機會都仲會打反擊，即使攻唔入都好，起碼個波留喺前場！
最後場笛一吹，深圳新鵬城2025年球季主場出師不利！
入場人數︰31205人......嘩！如果無記錯，呢一場入場人數係自2019年深圳佳兆業嘅揭幕戰以來最多人嘅一場！新翻新，深圳最大型專業足球場，2025年新鵬城開幕戰，票價優惠，都可能係原因！
總結︰估唔到今季第一場中超就有咁多個估唔到！
第一個估你唔到當然就係大手成交，第一場就入夠七個波，兩隊都無畏首畏尾，要攻就攻，打反擊亦都快！其實成場波嚟講新鵬城創造到機會比較多，除咗三個入球之外，仲有兩次非常有威脅攻勢係俾雲南守門員救出！不過後防似乎有啲問題，太易被對方打穿，主場對住雲南都失四球，有啲大意！
第二個估你唔到︰上次省港杯睇住拜合拉木條友被趕出場，今日又做「紅牌阿姑」！似乎中佬近年除咗剋主隊之外，仲相當剋拜合拉木呢條友！印象中中佬睇咁多場新鵬城，佢都係交白卷，今次又領紅牌！不過都有好處，直紅好似係停兩場，下星期對河南就唔駛見到佢！
第三個估你唔到︰老將姜至鵬仲有貨交，不過問題係佢始終係老將，一季最少三十場波，你唔可以靠佢頂晒，教練團要諗諗計！
最後一個估唔到，當然係全場決勝嘅一球，竟然係由港腳徐宏傑射入！上次東亞杯外圍賽香港死裡逃生，都係靠「傑仔」嘅入波，唔知安達臣會唔會將佢改造成前鋒！
下一場主場比賽對河南，中佬如無意外都會入場！
[ 本帖最後由 十二月田猛臣 於 2025-4-5 12:54 編輯 ]
| 
發表於 2006-11-5 20:58
/3 