註冊論壇會員，發現更多精彩
您需要 登錄 才可以下載或查看，沒有賬號？立即注册
×
20221010_52ae71a72b36e8cca9fcqozyWOyI0nwA.jpg
20221010_0e4b1d3ec357baccb849usjegMLHE4pw.jpg
20221010_0f2617bc2ad8a202ddb55m45fePH86dS.jpg
前言/廢話︰
上星期一場菁英杯，表面上又係一場大敗，而且賽後教練潘文迪亦已經辭職，不過成個過程中，其實又無想像中咁差！除咗入咗今季各項賽事第一個入球之外，球員表現出拼搏精神，呢樣係值得肯定。
隔兩日之後就公佈台灣回港的「風車Sir」郭嘉諾出任新教練，不過距離今個星期的比賽只有幾日，未必立即可以起好大變化。上一次「波記」中佬都講過，以依家深水埗的人腳，唔爭兵成效有限，果然在郭Sir加入之後，就宣佈由流浪借用烏克蘭門將奧利斯......雖然我個人認為門將唔係第一優先要增兵的位置，不過有增兵總係好事。
新教練上任後，第一場比賽又係菁英杯，今之對手係聯賽第一場對手港會，賽事安排有啲攪笑，因為同日同時間喺大埔運動場又有另一場菁英杯，所以今次呢場波就安排喺香港仔運動場！上星期一北，今個星期一南，好彩中佬星期六放13:00，趕得切！
門票︰
正價是80蚊，呢一場波亦都唔包括入今屆深水埗的主場比賽，不過可能有新教練Reboot，希望多啲支持者入場，於是星期五晚又係Facebook公佈會員又可以填表攞飛。
比賽過程︰
上半場︰
由於係菁英杯關係，所以雙方出場陣容都有調整，深水埗方面，新加盟嘅門將奧利斯上陣，應該係希望借呢一場同後防夾一夾。而港會方面，上次聯賽擊敗深水埗有不錯表現嘅費查同羅賓士高都暫列後備，派咗幾名華將上陣，不過前港腳基奧同積斯理仍然正選上場！
可能因為換教練，再加上之前已經連輸四場，所以深水埗一開波就壓上，頭一分鐘已經有第一次的攻門，不過港會亦都唔係放軟手腳，7分鐘之時基奧就有一次機會，不過俾奧利斯撲到之後中柱彈出！
上半場總括嚟講深水埗今場比較主動，埋門都有威脅。其實雙方都有入波機會，當中以深水埗26分鐘6號周家樂勁射，眼見必入之時，點知個波中楣彈出！黃金機會唔入，跟住大家都有啲膠著，節奏亦都慢返少少，猜猜吓球證亦都吹雞完上半場。
下半場︰
開波之後深水埗都唔敢谷得太上，而港會亦都唔太急，所以頭十分鐘左右又出現膠著狀態，大概60分鐘左右，風車Sir就開始撳掣，希望可以先開紀錄，同一時間換入上場入波的21號陳灝同14號烏哲里入場，而兩個後備入嚟之後，深水埗加強進攻，最黃金機會係66分鐘烏哲里勁射主楣不入！
年輕球員經常犯唔集中的毛病，今日又再出現，當深水埗攻唔入，轉個頭港會就打個突擊，基奧單對單挑過奧利斯射入！
落後之下，深水埗繼續反攻，33分鐘深水埗得一個角球，可能港會防守集中睇住烏哲里，點知隊長羅港威出奇不意咁開出一個好貼門嘅角球，更甚係港會守前柱的球員有啲發波瘟，竟然俾個波喺頭頂過，到守門員發覺之時已經太遲，個波直接彎入網！就係咁，深水埗追成平手！
去到尾段，當大家都以前打和完場之時，劇情又出現反高潮，因為深水埗仲有件事未發生！咩事？輸十二碼囉！開季四場波，場場都要輸球十二碼先安樂，去到第五場都一樣！港會一次攻門，深水埗後防一次魯莽解圍禁區內踢中對方球員，球證一吹......十二碼！
之前四球十二碼全部轉化為失波，不過今場又有啲唔同，因為有奧利斯守門！當深水埗其他球員仲同球證爭拗係唔係十二碼之時，奧利斯就叫其他球員俾個波佢，之後揸住個波行去十二碼點，「兇」正在等射十二碼嘅基奧！兩個高佬近距離互相怒睥，真係幾好笑！
最後俾奧利斯兇一兇之後，基奧果然射出一個角度唔太好嘅十二碼，又俾奧利斯捉到路撲出！最後再補多一兩分鐘，球證就吹完場！深水埗喺所有比賽連輸四場之後，終於迎來第一場和局！
入場人數：149人，呢個數字嚟講就真係偏低，可能足總負責編場嘅人真係要諗諗今日咁樣安排一南一北咁同時開波，最後互相搶球迷係咪合適！？
總結：
老實講一句，如果你問中佬係唔係好滿意呢場比賽嘅結果，我只可以講1:1是可以接受，過程中深水埗有三球中柱中楣，機會係有，但同時後防的甩漏仍然好多，而且對手只係唔算full team上陣嘅港會......
當然，當日中佬決定今屆支持深水埗，好大程度係出於支持港超，亦因為自己係「西九龍」人，完全會諗過深水埗會係爭標份子。球場上勝負乃常事，但中佬希望見到嘅係爭勝心同拚搏精神，雖然係比較遲，但深水埗球員開始上力，希望佢哋可以繼續成長！亦希望大家多多支持港超！
下一場主場比賽，10月16日15:00，對手和富大埔......
4/11 つづく......
[ 本帖最後由 十二月田猛臣 於 編輯 ] | 
發表於 2006-12-1 03:29
/3 