註冊論壇會員，發現更多精彩
您需要 登錄 才可以下載或查看，沒有賬號？立即注册
×
20230520_87f24581ede5d654be6abj8fwnyI3YCV.jpg
20230520_3de0659d203fe6da82a7yc543X0IpM00.jpg
前言/廢話︰今年港超剎科日都幾熱鬧，首先傑志同理文要上演決戰旺角場，雖然話傑志打和都得，不過比賽嘅嘢有時都難講！而晉峰仲好玩，竟然請到台灣人氣啦啦隊樂天女孩嚟香港表演，而且嚟香港8位成員仲包括XX……好可惜，以上兩場嘅門票一早賣晒，中佬只好留返深水埗場！雖然可能唔夠其他隊咁夠綽頭，不過深水埗體育會都盡力攪熱剎科戰嘅氣氛，人哋有台灣人氣啦啦隊，深水埗今場仲打孖上，搵咗一支本地啦啦隊Tumbler同一支女團asp3c表演，呢日開場前仲有嘉年華，算係盡力去攪旺今季最後一場主場！
點知......人算不如天算，突然間嚟個紅雨、雷暴再加個場地積水，就咁就要延後一星期！
.
門票︰正價80蚊，中佬本身係季票會員，今季最後主場比賽已包在內。
上半場︰
雖然今日無紅雨，不過由早上到依家都落雨，所以當比賽一開始，就發覺個場積水相信嚴重！但令我十分意外嘅係，即使雙方都有球員不在陣，都無進行hea踢，一開波就搶攻，只不過場地積水太嚴重，但波在草面上啜住根本推進唔到！喺咁嘅場地之下，踼地波進攻根本唔可能，唯一有效係高Q大腳，而只係短短幾分鐘，東方就憑住右路一個罰球斬入禁區，助攻嘅後衛朱銘謙頂入，就係咁東方6分鐘就領先一球！
水戰之下去到15分鐘左右，東方進攻之時，喺禁區入面被深水埗後衛剷跌，結果球證立即吹雞判罰十二碼，東方就由港腳孫銘謙負責操刀，不過「老孫」今次個射波選擇就錯咗，因為佢射向龍門左下角地波，但佢可能無為意今日禁區入面積水，射地波個波去勢俾積水減慢咗，而奧力斯今次亦都捉到路將個波撲出，力保不失！不過過到初一過唔到十五，去到26分鐘時，深水埗又再失守，今次又係死球戰術，角後開出，另一位後衛高素巴耶夫頂入，東方擴大領先！
落後兩球之下，深水埗都嘗試反撲，不過今日場地嚴重積水之下，根本好難「猜」到入去東方禁區，只可以由沈云燮幾之遠射，希望可以喺波重地滑狀況下有突破機會，不過今日東方把守最後一關嘅係葉鴻輝，所以最後都係無功而還。之後嘅時間喺大雨同積水之下，雖然雙方都好努力，但實在個場太難去組織攻勢，結果上半場最後以東方領先兩球返入更衣室。
.
下半場：
開波後形勢無乜大轉變，東方仍然係控制大局嘅一隊，而港腳孫銘謙上半場雖然射失一球十二碼，不過佢無乜受影響，非幣努力作戰，去到76分鐘終於有回報，仍殺入禁區扭過奧力斯，再冷靜射入空門，東方領先0:3。
之後嘅場地仍然係大雨，而且深水埗一向60分鐘之後都會跌watts，所以都無力反撲，本來以為0:3會係去到完場，但最後去到補時階段，東方仍然組織到攻勢，深水埗後衛陳靜謙禁區內又剷跌咗孫銘謙，球證又吹十二碼，今次東方仍然由孫銘謙負責操刀，佢就知道射地波嘅風險，改抽高波右上角掛網而入，東方領先到0:4。中圈開波之後無耐，球證就吹雞完場，結束咗呢一場水戰，同時深水埗同東方亦都正式完成22~23年度港超球季。
.
入場人數：344人，比平均入場人數都少咗，我估計主要原因係今日由早上到下午都落雨，雖然未至傾盆大雨，不過肯定會減少咗入場意欲，尤其係本身呢一場波係例行公事，對聯賽排名無影響，再加上上星期原本安排嘅啦啦隊同跳舞女團，今個星期都無晒，所以除非好似中佬咁想好頭好尾，否則入場誘因大減！
.
總結︰其實呢一場波，都可以嚟總結深水埗今個球季出現嘅問題︰
早段失波輸十二碼下半場體力下降之後失球增加攻力疲弱，無入球......
當然中佬在此亦都要向兩隊球員致敬，雖然係一場勝負無關嘅例行公事，而且今日場地又嚴重積水，再加上時大時細嘅驟雨之下，兩隊都無出現hea踢。甚至一開波之時兩隊都盡全力去搏，令到我都十分意外。
整場波其實都係優勝劣敗，東方瓣數較多，把握力較好，上半場一開波就憑罰球戰術首開紀錄，之下再一次又係憑角球再入一球，雖然曾經射失十二碼，不過對整場波嘅戰況影響唔大。
.
全季總結︰不經不覺，呢一篇已經嚟到球季最後一篇，回顧今年全年寫咗20篇，真係有啲估唔到！當然要多謝深水場體育會送咗好多場客場門票俾我，尤其係上半季之時仲未開返關，入場睇波真係提供咗好主要嘅娛樂。
如果以全季成績嚟講，今年深水埗嘅成績的確同當初中佬嘅預期有啲差距，原本我估計大概係4勝3和15分左右，結果同預計有一定距離，希望佢哋下一季可以達到最少15分呢一個目標。
由於之前兩次購買愉園季票，都出現不同原因嘅波節而完成唔到球季，今季改「燈」深水埗，總算可以完整完成球季，雖然在中佬嘅神燈之下，深水埗戰績欠佳，不過在此中佬都多謝今季各位落場嘅球員努力！
一個球季話咁快又完，如無意外下一季喺深水埗運動場仍會見到中佬嘅身影！不過下一季應該係9月嘅事，在此之前，中佬都有幾個計劃，有啲係屬於報復式，另有一啲係因利成便，呢啲喺嚟緊嘅日子就會同大家分享，當然到時就會係另外一啲版，好似係中超、亞洲足球、亞洲旅遊之類！
.
最後多謝各位，2023~24港超球季再見，中間日子就喺其他版見！
.
20/20 2022~23 香港超級聯賽 終了...... | 
發表於 2006-11-28 15:35
/3 