註冊論壇會員，發現更多精彩
您需要 登錄 才可以下載或查看，沒有賬號？立即注册
×
20231028_70c202581d3ac141869bPkGcW8iFvn9f.jpg
20231028_f92f4e84d6f48b2d6b70OFfPtP7ArzEq.jpg
前言/廢話︰雖然喺聯賽仲未開齋，不過兩場淘汰賽都先後晉級，對深水埗嚟講始終係好事！當然老老實實雖然係贏波，不過過程都相對勉強，只係入咗一粒就可以贏波。今輪就返返去聯賽，而對手亦都係算係同級嘅晉峰，雖然對手唔係好強，不過深水埗亦唔算好得去邊，呢一場波應該會相當接近。
.
門票︰正價80蚊，中佬本身係「成人通行證」季票會員，主場港超比賽已包在內。
上半場︰賽前公佈陣容，深水埗可以講係出盡所有法寶，除咗浦敏(紅牌)同小池晃廣(受傷)外所有外援都出盡，除咗新援宋柱國嘅地標戰之外，傷咗一輪嘅鄧加已經可以任後備。
相對之下，晉峰正選陣容中，只有兩名外援，似乎深水埗喺兵源方面比較好少少。
開波後反而係晉峰比較採取主動，開波早段已經有兩次射門機會，不過都係越楣而去，而深水埗企定之後都有返啲攻勢，黃金機會係28分鐘，柏羅邦喺中場搶到個波之後，一吓靚嘅直線俾張廣然喺右邊推進半單刀殺入禁區起腳，點知遠柱柱邊出界，錯失一個絕佳機會！
上半場餘下嘅時間，深水埗亦都唔能夠再做到有威脅嘅埋門，而晉峰亦都踢得比較保守，似乎大家都唔想上半場有咩「閃失」，最後大家亦合計祈望和局結束上半場！
.
中場休息︰今日深水埗趁主場比賽，又再請到女團Vaslav表演！雖然今日Vaslav只有四位成員演出，不過今次就著埋深水埗嘅球迷衫跳，比上次更加配合到比賽！下半場衫段時間，四位成員都有企上看睇咗一陣比賽，當時中佬都唔知睇波好定係影相好，罪過罪過......
下半場：
開波無耐深水埗就有一個黃金機會，50分鐘時尼高拉斯頂中眼看必入之時，俾晉峰守門員飛身救出。
相隔5分鐘就嚟呢場波嘅轉捩點，晉峰球員推進時宋柱國犯規攔截對手，本來球証已經出咗黃牌，點知VAR房突然打出「紅牌複查」，跟住擾攘一輪之後就紅牌趕咗宋柱國出場！至於呢一個紅牌，中佬只可以以四個字形容︰莫名其妙！
突然間打少一個，的確係好大影響，結果又係要雲尼馬高域縮返落去打中堅，不過今場波就無咁好彩，打少一個下守唔到完場，喺67分鐘之時，晉峰憑一個短角球9號斬中，當時中佬見到10「煽」咗個波入網，不過事後足球就計落去斬波嘅9號直接射入！
落後一球+打少一個，對手係同級對手，如果無乜「離奇」狀況，深水埗今次可以打開勝利之門嘅機會真係唔高！剩下嘅時間只係希望可以追平攞返一分，之後深水埗換入埋鄧加，希望可以「轟」開晉峰大門，不過似乎佢可能久疏戰陣，狀態不足，之後深水埗進攻斬波俾佢都無乜表現，最近旁一球係74分鐘接應罰球頂高！而領先一球之下晉峰亦以穩健為主，補時階段晉峰99號有一球「姿勢分」贏晒嘅倒掛，不過就越楣而去！
最後深水埗未能追平，晉峰今季聯賽小勝開齋！
.
入場人數：414人，似乎呢個都係咁上下，其實已經比另外幾隊同級球隊好。
.
全場最佳球員︰晉峰99號文智星。
.
總結︰
開波前其實對呢一場波都頗有信心，一來近兩場杯賽都可以小勝同級對手，而且晉峰只可以排出兩位外援，而深水埗就可以出大部外援！不過踢落就同之前預期有幾大分別，雖然晉峰華人球員唔算好高大，不過整體踢起上嚟機動性比深水埗強，尤其喺中場有些少優勢！當然佢哋做到埋門嘅機會唔算多，入嘅一球亦係全場唯一黃金機會。
至於深水埗，可能想用返對U23一招，上半場先同係打個和，下半場到對手體力下降之後一球完場！不過今日如意算盤就打唔響，上下半場各一次黃金機會把握唔到，下半場初段打少一個，再落後就好難追！
至於今場雖然有VAR，不過呢幾場波覺得港超啲VAR真係得個樣，只要球証主觀判斷，有VAR都可以唔理，或者喺同一類犯規下，有時會睇VAR，有時VAR房就無反應，咁嘅VAR真係要嚟做乜！雖然中佬睇幾十年香港足球，都知香港球証水平係點！所以幾十萬整套VAR，根本唔會對執法水平有咩提昇！如果希望引入VAR下有比較公平同準確嘅執法，似乎有啲「天真+傻」！
另外我比較擔心嘅係下一場係作客對傑志，首先唔知顏卓杉同張廣然有無迴避條款，其次本身實力有距離之下，撞啱傑志又喺亞冠小組賽三連敗，正所謂穀穀埋埋一肚氣，正要搵人出氣之時，撞正深水埗......
最後中佬要講嘅係，雖然本人身為深水埗球迷，不過正身就係晉峰嘅「幸運之神」，計埋呢一場，中佬現場睇5場晉峰比賽，全勝！如無意外第二循環作客青衣比賽我都會去睇，到時可能見證晉峰又一場勝仗！
.
下一場主場聯賽比賽：12月17日對老對手U23。
.
6/12 つづく...... | 
發表於 2006-11-25 22:54
/3 