註冊論壇會員，發現更多精彩
您需要 登錄 才可以下載或查看，沒有賬號？立即注册
×
20231110_22f46a5e32c2f8ec71d9lrfr4ZgaVSZB.jpg
20231110_f1137fd3b96b5f544a1bTsdKDESqJ7kI.jpg
20231110_e01c8aea53931e75c3d9SPxwgcuBmZXD.jpg
20231110_04c12e3755d03a34e523GzgUarN9ynrn.jpg
20231110_e820e9dc2612bfc79f737UR4E9RKM5ST.jpg
廢話︰對於深圳隊嚟講，中佬可以算係一個剋星級嘅球迷，由2018年親眼睇住佢升級，到2019年又見到佢打回原形，之後因為拆咗天海可以留級，「三年自然災害」之間曾經大手招兵買馬，最好成績為2021年排第6，2022年開季之時本來都係雄心勃勃，點知下半季已經出現異常，今季開波前更加爆出欠薪，當中有部份主力好似係李源一、葉力江季前已經離隊，更甚嘅係「神鵰俠」仲要同深圳隊打官司。
今季開波前已經爆雷，雖然上半季都曾有幾場有驚喜演出，不過到咗下半季當另一批主力好似係姜至鵬、元敏誠都走埋，成績就的確每況愈下，去到上一輪前，雖然大連人同南通支雲都踢到垃圾級，但最尾都無奇蹟出現，下季篤定降班！
2019年最後一場主場，睇住深圳降班，估唔到事隔4年又嚟一鑊！由於中超已經無咗兩支廣州球隊，雖然今季剎科戰對手係北京國安，贏面唔大，不過中佬都想入場去睇一睇，算係同後「金元足球」時代，艱苦支撐嘅教練球員講句「珍重」！
.
門票︰今次同上次一樣，都無售票處賣飛，不過就有大量yellow cow開工(事後先知原來呢一日寶體對面嘅場館有演唱會，啲牛牛賣完中超又賣演唱會，相當勤力)。當我見到牛牛之時開價80，由於我誤會了係120蚊位置，所以OK照買，之後先睇清楚係80蚊位，不過算喇！其實如果講吓價應該可平廿蚊左右，當飲少杯珍珠奶茶！
當黃牛攞個手機出嚟，我又開銀包數現金，後面另一個黃牛佬已經話「香港人」！中佬極度懷疑自己已經被深圳嘅黃牛幫點咗相！
對賽隊伍：
深圳︰上場無意外地輸埋之後，連最後數字上可以護級嘅機會都無埋，今場基本上係例行工事。
.
北京國安︰季初預計係爭標份子之一，加上新工人體育場入伙，點有人沖喜作用，只可惜雷聲大雨點少，去到下半季只可以在中遊徘徊！
比賽過程︰
上半場︰開波前公佈陣容，深圳隊正選仍然係全華班，不過外援之中阿歷山德里尼有列入後備名單，相信佢都會落場同球迷道別！
.開波之後首先採取主動嘅係深圳隊，可能因為係今季最後一場，希望好好表現報答仍然入場支持嘅球迷，另外我望落去今日寶體草面嘅水平似乎比8月對南通知時好，對於無乜條件打「高空波」嘅深圳隊可能比例好！開波只係4分鐘已經有一腳中龍嘅射門，不過威脅就唔大！
而北京方面，呢一場波要贏應該唔難，而得失球對全季成績應該影響不多，所以開波之後佢哋傾向都係慢慢，以不先失球為首要目標！去到18分鐘，北京就打打開呢一場波嘅局面，其實呢一球屬於深圳後防無太大壓力之下犯錯，無端端喺後半場傳傳吓波之後甩腳俾北京截到打反擊，殺入禁區之後29傳俾十碼點無人看管嘅7號輕鬆射入0:1！
落後一球嘅深圳雖然想反撲，但前鋒線十分單薄，對住北京三人後防俾唔到對方太多壓力，整體嚟講都係北京控制戰局！去到37分鐘北京又等到深圳後防「出沖」，13號解圍之時「撻頭」，將個波頂返去自己小禁區俾北京20號截到近射入成0:2！
上半場剩返嘅時間，都係由北京去慢慢猜，最後北京維持領先兩球完半場。
.
下半場︰
開波前阿歷山德里尼終於後備入替，而開波之後，覺得深圳多咗阿歷山德里尼喺中場負責組織下，進攻方面比上半場流暢！只可惜佢唔可以又負責組織又去進攻，結果當個波交俾其他前鋒之時，又俾唔到太多壓力北京！
北京下半場50分鐘就有一腳有機會射門，7號左路傳29號撞射俾董春雨救出！
之後落嚟嘅戰情都係比較平淡，贏緊嘅唔急，輸緊嘅又有心無力！不過球員仍然好落力比賽，甚至出現相對嚴重嘅受傷！北京嘅43號同深圳嘅12爭頂波之時出現「頭撼頭」，雙方都「爆晒缸」，估唔到嚟到季尾最後一場撞穿頭！
去到81分鐘，北京終於又有斬獲，今次同上半場兩球唔同，唔係深圳後防犯錯，後備入替嘅國腳張玉寧遠射中楣彈出，由於董春雨未及返身，就俾北京29號喺小禁區位置輕鬆頂入成0:3！
之後喺大概85分鐘時，場波基本上已經「入晒雪櫃」，跟住都係垃圾時間，下層深圳球迷組織帶頭領唱「海闊天空」同「講不出再見」，而另一位置嘅球迷會「深足12人」，亦都唱出「友誼萬歲」，場面感人！4年前打和河南時，大家都仲有希望返去中甲一年就會再返中超，但今次一別之後，真係好難講幾時再見！
最後補時4分鐘之後，深圳隊又再一次告別中超，不過今次唔知係「暫別」，定係「永別」！
完場後︰由於呢一場比賽不單係深圳今季最後一場比賽，由於篤定降班，如果無其他「場外」事件發生，亦會係最少2025年前最後一場中超！講句唔好聽出年中甲見唔見到呢一隊深圳都好難講！
所以賽後球員都走到主場球迷面前作一個最後嘅告別！球隊方面就準備咗十個八個足球踢上看台，而阿歷山德里尼仲將自己對boot送咗俾應該係打氣團嘅指揮！
而另外有好多球迷就將自己件波衫或者係打氣巾掟落去跑道，俾啲球員簽名之後掟返上去看台！但呢一度中佬就有疑惑，球員簽完名之後，掟返上看台，根本唔知件嘢係邊個掟出去，而且啲波衫同打氣巾好多都差不多，好容易會撈亂！
.
入場人數：9021人，以篤定降班球隊最後一場例行公事，算唔錯！其實深圳有一定足球迷，如果可以放寬球隊搬遷限制，相信有一啲細城市球隊可能都會搬嚟深圳！
.
總結︰
記得4年前打和河南嘅賽後報告，當時中佬以「一場遊戲一場夢」來命題，而今次則以另一首老牌英文歌名命題，相信我都唔需要多講原因......
單以呢一場嚟講都係典型優勝劣敗，可能由於無乜可以爭，北京基本上都唔算撳住深圳嚟工，上半場都係慢慢踼，入嘅兩球都係深圳後防自己出沖！
到下半場深圳出返亞歷山德里尼之後，雖然流暢度比上半場好，但由於鋒力薄弱。到輸埋第三球之後，基本上都係等完場。
全季嚟講，其實如果深圳可以全季都保持季初嘅人腳，再加上三位外援，其實唔係完全無得踢，即使要護級亦都唔應該去到包尾呢個位！當然呢個世界係無「如果」，場外太多財政問題，一隊波連基本薪金都出唔到，市政府只可以盡力確保隊波嘅營運，同短短幾年前比，的確係有天壤之別！
以目前狀況下，出年最近香港嘅中超主場係梅州，而梅州距離香港幾遠，亦唔知有咩景點？所以要我去梅州睇波難度都好高！咁呢一場波好大機會係未來一年甚至幾年最後一場入場睇中超！
最後，呢一場中超係今季最後一場，後會無期！ | 
發表於 2006-11-25 20:04
/3 