註冊論壇會員，發現更多精彩
您需要 登錄 才可以下載或查看，沒有賬號？立即注册
×
20231223_aafdcada1ad6d395dee2DhUlkW7WfxFO.jpg
前言/廢話︰距離上次入場睇深水埗比賽都已經有個多月，中間只係睇過一場中超同香港隊，到呢個星期又終於有主場聯賽比賽！
由上次到今個星期，期間深水埗呢隊波都有唔少轉變，首先係教練團轉咗以「飛碟Sir」陳浩然為主教練嘅團隊，另外隊中兩位泰援柏羅邦同浦敏，同埋日本外援小池晃廣都已經離隊。由陳Sir接手之後都有幾場比賽，上星期足總杯仲爆冷互射十二碼之下淘汰咗南區殺入四強！再之前有一場銀牌同流浪打到加時先輸波，另一場聯賽作客對理文，雖然輸波但過程上同理文都互有攻守，再唔係俾人大炒捧蛋完場！不過另外喺菁英杯表現又未如理想，可以反影到目前進步中，仍然有水準唔穩定，愈強愈強，愈弱愈弱嘅老問題！
.
門票︰正價80蚊，中佬本身係「成人通行證」季票會員，主場港超比賽已包在內。
.
上半場︰深水埗今場正選陣容都可以講係基本出晒可用嘅人，上半季三位外援浦敏、柏羅邦同小池晃廣已經離隊。開波之後唔知係天氣凍定係大家都驚輸，節奏唔係好快，而且比較佔主動返而係U23！
但係雙方都保守之下，有質素嘅攻門唔多，雲尼馬高域同鄧加分別有射門，但係威脅唔大！而U23呢......？上半場一腳似樣射門都無，中佬喺看台愈睇愈凍，場上嘅李溢晉可能仲慘！
.
下半場：
開波後節奏同上半場差唔多，正當中佬疑惑會唔會兩隊都怕輸，0:0完場都收貨？但係唔聲唔聲，場波又突然「風迥路轉」！53分鐘，U23右路得到一個罰球，斬中之後漏咗去尾柱俾U23嘅6號尾柱頂入，不過同一時間旁証就已經舉咗旗顯示越位。U23就當然圍住個球証，不過依家唔駛勞嘈，有VAR可以幫手睇睇！當然根據規矩判無效嘅入球就睇VAR，不過唔係今日天氣太凍定係上半場太悶，VAR房好似瞓咗覺，等咗5~6分鐘都仲未有結果，場上球員又無奈，看台上觀眾又不滿！結果球証慢條斯理之下，確認越位！
雖然係詐糊，但無可否認深水埗都係走漏尾柱，似乎有啲警示......72分鐘時，場波嘅僵局終於被打破.....U23 10號殺入禁區，扭過近幾場表演穩健嘅拿亞準備射門之時，拿亞心急一手拉住佢件衫，U23 10號當然立即跌低，而球証亦都立即吹罰十二碼！之後當然都要經VAR覆檢，不過講公道話，呢一球一定係十二碼！中佬遠在看台的明顯見到拿亞拉衫嘅動作！最後確定十二碼，U23 10號親自操都射入領先。
其實呢一球十二碼之失真係好唔抵，不過更無奈嘅事跟住即刻發生！開波後無耐，個波輾轉去到禁區頂，一向穩陣嘅雲尼馬高域突然被U23兩個球員夾撃下，俾對手喺自己禁區頂搶咗個波，單對單面對李溢晉，講衰句真係問你「要左定要右」！最後U23 10無甩拖之下射成0:2！
領先兩粒之下，U23球員十分興奮，成隊衝晒出跑道慶祝......中佬當時除咗西口西面之外，望一望個鐘仲有成廿分鐘，心諗︰咁早就咁high？一陣完場之時咪high到裸跑都似！
失呢一球嘅同時，雲尼馬高域亦都拉傷咗要換出......真係大鑊！損兵折將！不過足球呢一個活動，吸引人之處就係會隨時意想不到地反轉！77分鐘之時，顏卓彬禁區外右路斬去尾柱位置，鄧加一控一射，追返1:2！之後仲係「飄飄然」開心緊嘅U23好似仲未瞓醒，中圈再開之後深水埗乘勝追擊，後備入場嘅陳灝「爆」過U23 右後衛，底線出個中腰波，艾雲馬高域及時衝到撞射入網！就係咁，U23 衝晒出場嘅興奮，6分鐘後打回原型！
之後廿幾分鐘時間，雙方都有啲保守，U23領先兩粒之下被人火速追平，固然唔敢再輕出，而深水埗難得追平之下，亦要調整！之後時間又開波去返0:0之時嘅悶局，深水埗艾雲馬高域有一次笠射，但角度同力度都唔夠俾U23守門員接住！
反而U23喺補時階段有一次「絕殺」機會，6號面對李溢晉嚟一個「挑射」，緊緊越楣而去，中佬都嚇出一身冷汁！最後，補時9分鐘之後，雙方無法再入波，2:2平手完場。
.
入場人數：434人，開波前有朋友whatsapp問我今日咁凍，會唔會一百人都無？咁深水埗都有街坊基本盤，唔會咁差！
.
全場最佳球員︰U23 入兩球嘅10號林學㬢
.
總結︰同中佬賽前估計一樣，深水埗對住強隊時嘅表現，好難喺同級隊伍中出現。如果撇除雙方犯錯嘅十分鐘，大家都唔係好做到一啲有威脅嘅射門！所以總括嚟講，打和亦都係合理！
賽後見到U23教練對賽果十分不滿，亦有直指個別球員犯錯，令到U23喺領先兩球之下攞唔到三分！中佬個人就覺得有啲攪笑，首先領先兩球之下俾對手短時間內連入三球反cup，足球比賽常見，根本無所謂領先下必定要攞三分嘅道理。而且如果怪個別球員，老老實實成隊波都有責任喇！領先到0:2，成班球員衝晒出去慶祝，唔講仲以為贏咗波！班球員當時諗住hea埋之後時間就可以贏波喇......今次亦都係一次好好機會教訓一吓呢班小朋友，一日球証未吹雞，都要打醒十二分精神！
至於深水埗，今場唔輸又係好彩，之前對南區表現唔錯嘅後防，呢一場兩次犯咗致命仲要係低級錯誤連失兩球，好彩係經調整後，趁U23班小朋友仲「飄」緊之時火速連轟兩球追和，唔係就真係無眼睇！
.
下一場主場聯賽比賽：由於有亞洲杯賽期，為配合派出香港隊球員，呢一段時間主要會係菁英杯比賽，所以深水埗下一次聯賽要去到2024年2月4日，對手係大埔！
.
7/12 つづく......
全年小統計︰
今年中佬睇主場比賽，成績真係慘不忍睹︰
深水埗︰1勝1和9負
香港隊︰1勝1和0負
海外︰
FC首爾︰0勝1和0負
深圳︰0勝1和3負
Tampanies Rovers︰0勝0和1負
希望2024可以轉下運！
| 
發表於 2006-11-24 19:24
/3 