註冊論壇會員，發現更多精彩
您需要 登錄 才可以下載或查看，沒有賬號？立即注册
×
20240615_6de41831dfd78c349f8ay54ZKwOvLByn.jpg
20240615_2a9e87ac50eb4da48862Ppsv9vl6EFuQ.jpg
20240615_83c17ba28dabf6e07fb44fG6puE4nXXT.jpg
20240615_9fbc296cce99ba4745dfCUVlYqQhNUkx.jpg
20240615_70bcca0b5cb6a6cc7acciNISxwNDdc56.jpg
20240615_00362994920ed2e87ee3Pi2J9SPgh6dr.jpg
前言/廢話︰又到一年一度，港超最後一個比賽日，世有時都幾巧合，上一季深水埗最後一場比賽，亦都係對東方，不過上季最後一場波就因為天雨關係而延期。而今年就係季前無預算到，深水埗可以殺入足總杯決賽！
不過所謂「天布不測之無雲」，喺大家為咗決賽準備之時，突然間話會打風！如果打風的話，理論上係會延後一日，不過如果星期日嘅狀況仍然係唔允許比賽的話，就會相當麻煩，因為之後係國際賽賽期，東方同深水埗都有人入選香港隊，可能一延就延多兩星期，但係如果延兩星期，球員合約，外援簽證都會有問題！
所以到當日早上，見到三號風球無再上，大家個心先定啲！
.
門票︰正價100蚊，中佬有參加深水埗嘅預售票計劃，都係100蚊，不過就有多件毛巾。
.
上半場︰
入場坐低先食埋盒飯先，望一望個場......嘩！場波都未踢，中圈附近已經爛晒，一陣點攪？公報出場名單，深水埗係用返四強淘汰理文嘅陣式，鄧加先做後備，蘇沙、張廣然同尼高拉斯負責攻堅。中後場就係拿亞同宋柱浩陣守中路，小田倉康太為中場第一度屏障！
開波之後形勢同預算相似，東方控球指稱佔優，東方第一次有真正威脅嘅射門係12分鐘馬希偉嘅射門，好在李溢進用腳擋出！另一次喺28分鐘，余在言直射罰球，今次都俾李溢進救出！33馬高斯近射又俾李溢進擋出，馬希偉補射又俾宋柱浩奮不顧身，落咗地仍然奮力用頭擋出！三番四次東方都未可以射入深水埗嘅大門，而深水埗上半場戰術相對係偏向保守，無大力壓上前，後防表演穩健，不過前面就未有太大威脅，最後半場0:0完場！
.
下半場：
下半場開波前，深水埗就有第一個換人，鄧加入替張廣然，似乎下半場就係真正較量開始！東方仍然係主導，不過深水埗主守之餘，都唔會坐以待斃，主要係靠一啲死球戰術去威脅東方！65分鐘時就係整個下半場最有威脅一次，罰球斬入禁區，波比頂到，個波飛向楣底，可惜俾一貫專注嘅葉鴻輝飛身托出！
而東方就喺73分鐘時，巴科爾有一腳近射，不過都係俾李溢進擋出！反而整體嚟講，東方下半場攻門嘅黃金機會仲比上半場少！
去到尾段，東方對住深水埗嚴密嘅後房，雖然佔控球優勢，但始終都係「老鼠拉龜」，點知進入補時階段就出現風起雲湧！東方猜入禁區，個波撞吓撞吓，忽然由左邊撞咗過右邊，最後東方嘅余在言撞射入網！
去到補時階段仲有唔知幾耐嘅時間，俾東方入咗一球，中佬同一眾打氣團老友都無言以對，雖然深水埗球員立即攞返個波出中圈準備立即再開，但剩返時間真係唔多！當準備再開波之時，球証突然間示意暫停，同一時間大螢幕打出Checking Goal！如果深水埗仍希望繼續比賽，VAR就係目前唯一嘅希望！
就係等候VAR結果時間，中佬腦海之中閃出舊年喺新加坡一幕......當時客隊入波，但要經VAR核實，同一時間主隊球迷大叫「No Goal！」，No Goal中文/粵語點譯？譯唔到，唔諗喇！於是中佬本能反應下大叫「No Goal, No Goal」，難得係打氣團一眾兄弟好似有默契，同一時間亦大叫No Goal！之後深水埗呢邊看台，不論識唔識英文，或者No Goal呢個名詞合唔合文法，大家一概不理只係用盡力去大叫「No Goal！」。
球証check咗好耐，最後吹雞示意入球無效！同一時間大螢幕亦顯示「越位」！深水埗看台呢一邊大家撃掌，擁抱，好似經歷一次「生離死別」咁！東方球員條氣梗係唔順，同球証理論，當然無用，深水埗開出罰球！剩返時間唔多，深水埗大難不死，亦都立即打醒十二個精神，最後球証長雞一吹！全場比數0:0，需要加時三十分鐘再分勝負！
.
加時上半場︰
從新再開波之後，深水埗突然呢一個攻勢，蘇沙壓過對手頂中龍，點知又係俾葉鴻輝救出！去到97分鐘，東方終於憑一個角球打開僵局，高素巴那夫頂中龍，李溢進已經有反應撲到，但唔好彩個波彈高之後省中楣底再反彈，李溢進嘗試再撈返出嚟但個波最後仍然碌咗入網！3分鐘之後，東方一次簡單直線，巴素爾爆開小田倉，之後再扭過埋李溢進，輕鬆射入成2:0。
短時間內連失兩球，如果以平日嘅深水埗，輸波都達九成九！不過今日係踢決賽，無理由咁就認命！中圈開波之後，隊長顏卓彬身先士卒，自己喺中路突破，居然俾佢hold住個波喺禁區內，東方幾個球員上去都搶唔到個波，最後佢交咗俾尼高拉斯起腳，終於射破葉鴻輝嘅十指關，喺東方球員剛剛慶祝緊入第二球之際，一盤冷水潑返過去，表示深水埗仲未輸得！
去到補時階段，深水埗前場搏到個罰球，啲高佬當然衝晒上去，結果個波斬俾鄧加，佢銅頭一搖之後，葉鴻輝欲救無從，個波死角入網！就係咁！場波又再從新嚟過！
.
加時下半場︰
可能由於加時上半場15分鐘之內入4球，實在太過刺激，所以到咗加時下半場之後大家都好似慢返少少，亦可能係體力搏到七七八八，雙方都有攻勢，但係真正入肉嘅攻勢就唔多！結果磨到去114分鐘之，東方右路一次攻勢，巴科爾喺小禁區外把握到一次射門，東方再度領先3:2！
之後時間東方當然唔會谷得太上，而深水埗亦試圖去反撲，不過體力亦都已經去得差不多！之後最有機會追平係嚟自蘇沙一個「撐龍舟」頭搥，個波係中龍，不過唔多夠力，考驗唔到今日有水準發揮嘅葉鴻輝！
補時階段東方有一次拉開比數機會，但俾李溢進救出！而最後一刻深水埗黃琛喆射門亦都因為撻Q而被葉鴻輝沒收！最後長雞一吹，經過120分鐘激戰之下，東方以3:2擊敗深水埗奪23~24年度足總杯冠軍！
.
入場人數：3437人，以今日入場時間有大雨，都係令旺角場有超過50%入座率都算唔錯！
.
全場最佳球員︰深水埗守門員李溢進。
.
總結︰
最後結果係無奈同難受，球員拚盡120分鐘，未能奪取兩季以來首個錦標，下一次再入任何比賽決賽真係不知等到何年何月何日？
對於球員表現，中佬已經無任個可以挑剔嘅地方，拚到最後一刻都唔認輸，我哋喺看台一眾打氣團兄弟亦都從來唔放棄！
至於深水埗呢一隊波下一季去向如果，中佬就無獨家料，從大眾媒體中得知情況並不樂觀！如果不幸地不能再喺港超舞台繼續，就只可以講又應驗咗中佬「黑腳」嘅事實。
.
最後多謝各位，2024~25港超球季仲會唔會見到中佬喺呢一版吹水，目前仍然係未知之數！不過以中佬口水多過浪嘅性格，之後日子一定會喺其他版再見！
.
18/18 2023~24 香港超級聯賽 終了......
| 
發表於 2006-11-13 06:16
/3 