註冊論壇會員，發現更多精彩
您需要 登錄 才可以下載或查看，沒有賬號？立即注册
×
20240721_e789ed0db04b41b5d0b1eVVubN6ccAqH.jpg
20240721_263281cab14a0636e5ccKA0z6Ww3cDdb.jpg
20240721_9d0a5873c5dbff1a6fbc2DAKLIKvhkaq.jpg
20240721_de7cf9112d7584be57192rtXhlrAYvkQ.jpg
廢話︰上一次睇中超已經係三月尾復活假嗰一期，之後因為連續多個星期都有深水埗嘅比賽，所以兼顧唔到中超！足總杯之後又撞上國際賽期，之後去到6月25日，新鵬城先有比賽！但呢一場比擺平日星期二晚，中佬自然就唔會休假上去咁浪費，結果要嚟到七月中先有週末比賽，所以都可以入場睇吓，仲有機可以見到兩位香港球員，安永佳同周緣德同場比賽，對於香港外流球，我哋都希望大家可以支持佢哋！
.
門票︰今年改用票星球系統，同大麥網唔同，真係一張實體飛都無，所有都要用微信小程序去買，由於中佬一向都無什麼電子支付，所以都係假手於人！不過票星球系統近期都有改善，之前如果要核實要內地電話號去收SMS碼核實，依家就可以接受以Wechat戶口去核實。咁我今次係叫大馬騮用佢個戶口幫我買飛同俾錢！
去到球場之時，在附近行一個圈，真係搵唔到黃牛！似乎呢個票星球系統真係攪死晒班yellow cow！以中佬嘅角度就梗係希望維持原有模式，有yellow cow同實體飛，一來有張飛收藏有時攞出嚟欣賞下都係一種樂趣！二來有yellow cow，就可以根據場波嘅受歡迎程度，由黃牛去將票價作出調整！
對比上次去到門口即場買電子飛，入場之時仍然有好多問題，今次我早兩日己經買咗飛，而且入場系統都有改善，之前係要人手在一台PDA上輸入回鄉卡號，今次閘口已經加咗一台好似出入境用嘅scanner，放張home return card上去一scan，再影埋「沙龍」，就可以去過安檢！
題外話︰有朋友問我睇場波都影相？我話估計係影咗相之後，將我張相掟落去「大數據」，之前有被通緝人士，就係去咗睇張學友、周杰倫嘅演唱會，入場後被拉，我估計都係入場時影嘅相作怪！
對賽隊伍：
深圳新鵬城︰如果以升班馬計，第一年升班都預咗要「磨合」同交吓學費，雖然背後有城市集團，不過都急求一時成功，無大手以超高價收購球星。成績暫時都係麻麻，今季大部份時間都應該要護級。夏季轉會窗開咗之後都有添新兵，睇睇有無成效！
.
河南︰由於資金唔夠其他隊伍多，所以近幾季都係中下游位置，今季季初引入有「球隊終結者」之稱，名宿李偉峰為球隊經理，打咗十輪左右成績欠佳，本來以為教練先收工，點知反而係李偉峰辭職先！李偉峰走咗之後反而成績仲好咗，雖然都係護級，但成績比新鵬城仲好，賽前領先三分。
.
上半場︰開波公佈陣容，真係唔知塔托攪乜，唔知係咪學深水埗，聯賽重要性低過杯賽，好幾位常規正選都唔在陣，尤其係外援方面，由於7號泰亞高停賽，所以無得踢，但11號嘅艾度亦唔見人，9號嘅阿曼圖斯亦連後備名單都無，唔知係咪轉會窗期間已經收咗工！19號安永佳仍然係後備，至於新加入嘅外援都係後備。正選方面只係出咗杜加利奇同奧迪斯兩位外援！讓賽？
開波之後河南反客為主，立即壓住新鵬城嚟打，望落今日河南隊戰術大概係中場開始逼搶，之後交波俾前線，深圳「老熟人」阿基彭姆，利用體力同速度壓新鵬城右後防，希望可以引開俾中路可以有突破。而新鵬城方面今日前線只係得「新疆仔」拜合拉木打單箭頭，之前睇過呢條友啲波，速度同體能係有，走位意識都唔錯，但腳下功能好粗糙，控個波都控到甩甩漏漏！但佢近排有啲運，分別為國家隊同新鵬城入咗兩個好關鍵嘅入波，亦可能係咁塔托俾多啲實戰機會佢。
去到8分鐘之時新鵬城差啲失守，河南角球開出，頂個彈地波笠過彭鵬，但入網之際俾杜加里奇打個倒掛勾返出嚟，點知呢頭解圍出嚟，球証就吹停......入咗！？球証指中圈開波！不過所有中超比賽都有VAR，所有入球都要VAR核實，最後改判入球無效！嚇到中佬一額汗......
之後兩隊都係維持同一形勢，河南控球為主，新鵬城靠突擊，但兩隊射門水平都係一般，未能考驗到兩位門將！
拖拖拉拉之下，半場就咁完結！
下半場︰
一開波3分鐘，阿基彭姆有一個半單刀推進，新鵬城守門員彭鵬出迎，喺禁區外撲跌咗阿基彭姆！大鑊！呢啲位多數會做「紅牌名姑」！點知球証跑埋去，只係俾個黃牌彭鵬，咁好世界？河南啲球員當然好慶，但過咗一VAR房call落場，叫球証睇片，睇完片之後，球証取消張黃牌，改判紅牌！下半場一開波就打少一個，大鑊！之後就以剛剛由武漢三鎮轉會到新鵬城，另一位深圳「老熟人」魏黽哲入替把關。
下半場只係打咗5分鐘打少一個，根據返上半場個勢，河南會進一步攻，新鵬城無選擇之下要主守，不過世事又總會有意外，4分鐘後，拜合拉木引球入河南禁區，同河南後衛發生碰撞，球証就直指十二碼，河南就梗係唔順圍住球証理論......擾攘一輪之後，奧迪斯準好操刀，點知呢個時間VAR房又call落嚟，溝通完一輪之後又要睇片，睇完片之後又更改判決，取消十二碼！
本來諗住有機會開紀錄，但依家又打回原型，之後場波就出現好膠著嘅狀況，新鵬城打少個，自然唔敢谷太上，前面淨返拜合拉木一條友，佢速度係有但技術就唔入流，如果想佢單打獨鬥，佢控波之時又甩頭甩腳，根本起唔到咩作用。
至於河南亦係難兄難弟，阿基彭姆下半場體力下降，已經無力去爆開新鵬城嘅後防，斬波埋去，杜加里奇又頂晒，再唔係魏黽哲雖然係臨危受命入場，但喺寶體比賽佢都相當熟悉，甚至我覺佢出迎之時氣勢仲強過彭鵬！
由於下半場有兩次VAR介入，不過補時成十分鐘都真係幾惡項，唯一好彩嘅係河南本身攻力都係有限公司，雖然成個補時階段都壓住新鵬城，但一腳似樣嘅射門都無，最後球証長笛一吹，打少個嘅新鵬城執返一分。
.
入場人數：5643人，以星期六嚟計都算係少，不過總比上次前對浙江得三千人入場好好多。
.
全場最佳球員︰新鵬城後防「定海神針」杜加里奇。
.
總結︰如果以最後比數嚟講，喺差唔多成個下半場都1打少一個嘅狀況下，打和執返一分都係不幸中之大幸！不過成個過程就真係不敢恭維，基本上成場一腳可以威脅到河南嘅射門都無，都相當肉酸！而且我始終對新鵬城都練塔托對於換人嘅決定有意見，尤其係之前都批評過，換人太遲，名額無用盡之外，今場波前線泰亞高停賽之，竟然只係出兩個外援，根本就係讓賽！仲要吹漲到本來係簽咗新外援，結果新外援只係嚟睇波！
比賽之後兩日，新鵬城居然有爆炸性官宣，向上海申花借入「神鵰俠」，為期六個月！跟住落嚟今個月仲有三場主場比賽，如果大家想一睹中國國足「未來十年嘅核心」，神鵰俠嘅風采，為佢獻上「最真誠」嘅祝福，就可以考慮北上吃喝玩樂之餘，入場欣賞新鵬城嘅比賽。
至於中佬下一次幾時會入場嘅呢？依家都未能決定，本來對長春亞泰呢一場時間上係可以，不過中佬近排為咗同馬騮的暑期活動都駛咗一大筆，荷包相當拮据，睇場波130蚊本身已經唔算平，再加上新鵬城成績又麻麻，多少都影響入場意欲......
| 
發表於 2006-11-12 18:13
/3 