註冊論壇會員，發現更多精彩
您需要 登錄 才可以下載或查看，沒有賬號？立即注册
×
20250413_3a7bf217bd7b7f1e2ff6QCcg8BWep9d0.jpg
shy.gif
20250413_938cd261f281d00b68eeYPNOKrQWLL07.jpg
20250413_81d2029d0336589549bcY5rlG3GmsmZc.jpg
20250413_1121795f6d8bfd20fc4fP7t0ozttx7BU.jpg
廢話︰上星期深圳新鵬城迎接今季第一場主場比賽，亦都係深體翻身之後嘅第一場比賽。結果就當然未盡人意，不過整體表現又唔算得太差，如果好彩少少應該可以打和執返一分。今場就安排喺星期六開1935，呢啲時間係最好，星期六收工食完午餐之後他他條條北上，可以去Shopping完之後，食埋晚餐入場！完場之後只要唔好嘆慢版，係夠時間由福田口岸返香港......所以今個星期照去喇！
.
門票︰今場就唔係位位80蚊咁好世界，不過面邊龍門後面同四邊角都係80蚊，所以今次仍然係買4樓區域。
對賽隊伍：
深圳新鵬城︰上星期主場開幕戰輸俾雲南玉昆之後，有一場作客浙江，本來都咬住幾緊湊，只可惜去到補時階段被對手連入兩球拉開戰區而輸波！呢一場開波前係1勝0和3負有3分。
.
河南︰賽前只係得一場和局有1分，而且上一場仲要領先下被對手補時連入兩球反cup，近日亦都傳出「無糧出」問題，今季似乎唔多樂觀！隊中熟悉嘅球員有前深圳佳兆業球員阿奇姆彭，同香港隊中堅周緣德。
比賽過程︰
上半場︰新鵬城呢一場換咗守門員，由季家葆把關，其他嘅主力都同上前分別唔大！但中場主將卡爾采夫仍未見人！
開波之後，初頭覺得新鵬城形勢好似唔錯，河南開波一段好多無喇喇傳失波，而且新鵬城一向控球方面指數都比較好......但係踢踢吓就發覺有問題，唔知係因賽程好密問題，硬係覺得新鵬城啲球員今日步速好似有啲慢，而且對方就去「拍波」之後，總覺得新鵬城啲球員好似企唔穩，爭波十次輸八次！
去到上半場中段之後，新鵬城控球佔優，但竟然見唔到一次有威脅嘅射門，反而河南方面雖然表面上受壓，但係打嘅反擊反而更有威脅！上半場新鵬城守門員季家葆已經作出幾之撲救！點知去到41分鐘，河南終於打開缺口，一個角球攻勢由23頂入，今季新鵬城後防喺守死球問題比較大！
混混吓之下，新鵬城半場又落！一般嚟講落後一球有得追，不過今日新鵬城唔似有一個爭勝決心！
.
下半場︰
開波之後，現場球迷當然係希望新鵬城可以盡快追平甚至反cup，不過現實當然無咁理想......開波之後，反而係河南佔有更多攻擊，尤其係直接射門，季家葆多次撲救！去到58分鐘，又係罰球攻勢，結果又俾河南36號頂入......喂！你班友攪咩？尤其係杜加里奇，你點指揮啲隊友佈防？仲有利安高，你有無追返人哋36號，佢係中堅，你要釘返佢架！
輸到第二球就好大鑊，因為唔知係咪體力問題，今日隊新鵬城好似無厘神氣，輸一球都仲有機會，輸兩球就好困難！果然未等到新鵬城入波，62分鐘河南又再憑死球嚟料，罰球斬入禁區，新鵬城解圍不遠，又攻返入禁區，最後一輪混戰之下，河南竟然由助攻嘅後衛，港腳周緣德射入！
嘩！之前一勝難求嘅河南，南下作客深圳竟然領先到0:3，簡直係......點知呢個時間球証又話要睇VAR，最後當時唔係好知咩原因下，呢一球判詐糊！
雖然周緣德呢一球被吹返轉頭，不過要輸始終都係要輸，去到71分鐘，河南一之反擊，阿奇姆彭單刀推入禁區，同出迎嘅季家葆「炒埋一碟」，球証第一時間係吹俾河南一個十二碼，不過同一時間旁証舉旗示意越位！之後無立即開波，VAR房call落嚟要球証睇片！球証睇完VAR後，示意越位不成立，所以十二碼時成立，同時間比咗個黃牌季家葆！十二碼由河南40號操刀，佢射出一個無乜力，不過呃到守門員嘅波入網！
輸到0:3，現場有唔少球迷都開始走！比數係一個大問題，不過更大嘅問題係睇唔到新鵬城今日有爭勝決心，個別球員表現完全走晒樣。而中佬由於要趕2230前去福田口岸過關，所以雖然無提早離開球場，不過都走咗落下層，準備走之時可以快一啲！
去到84分鐘時，新鵬城終於攞返少少面子，楊一鳴喺右路禁區外突然放一腳冷戰，個波直飛死角入網！就係咁，終於破蛋！不過跟跟住十幾分鐘加埋補時時間，新鵬城同河南都係喺中場波來波往，又係喺句︰贏嘅唔急，輸嘅無力！混混下又到球証吹雞完場！
.
入場人數︰30133人，雖然我唔知新鵬城係唔係派咗好多免費飛出去，不過呢個人數都真係唔少！深圳有球迷，但係個Product要對得起入場支持嘅球迷！
.
總結︰中佬都好多年無睇波一場咁火滾嘅波，並唔係雙方打茅波，或者球証執法不公，而係對於中佬嚟講，呢一場波新鵬城嘅演出，對唔對得住三萬幾入場球迷！？中佬一向睇波，贏輸都好，唔好針到個別球員，不過今日真係忍唔住！
薩卡里亞︰上場表現唔錯，但今日表現完全走晒樣，既唔做到後上幫利安高，進攻之時更加頻頻斷纜，根本唔知點解可以踢足90分鐘！
艾度加西亞︰上場插上入兩球，今場跑動都比較慢，無晒應有威脅力！
姜至鵬︰其實唔可以怪晒佢，36歲老將，仲要打翼衛撲上撲落，8日內踢三場，雖然對淅江無踢足，但應該真係頂唔順！今場跑動慢咗，同對手埋身爭波之時又企唔穩，最慘係不嬲準繩號傳中波，今日完全無晒，角球，罰球都斬到「唔湯唔水」，仲要踢足90分鐘，李智去咗邊？
.
最後，對於今場波如果要有一個評語，就係套用「退錢哥」名言︰你對得起我們嗎？退錢！
俾返80蚊人仔我，去XX大米食返餐都好！
[ 本帖最後由 十二月田猛臣 於 2025-4-13 09:13 編輯 ] | 
發表於 2006-11-5 20:24
/3 