註冊論壇會員，發現更多精彩
您需要 登錄 才可以下載或查看，沒有賬號？立即注册
×
20250822_d8d45391f5952109fd74chWOkkyjuWYK.jpg
20250822_6e7caa52a230019bb72cjyCkkUC5FbbK.jpg
20250822_b039e6c9fb4cae1bb74d6LDYNDAsGPPx.jpg
20250822_e1fbbaa68501a4f56888yAIapXMCKcuo.jpg
20250822_74f8a96877e9d2b091dc6kKQasWaZJKx.jpg
20250822_287ab67ef723988a876abZzW0R4cbra0.jpg
20250822_ac2127f1c52794ba7512jGNTcjyD0RVz.jpg
20250822_6eb951d56bd9a9cbcdcfZSvOMyL1mEzP.jpg
20250822_2ff6d7c13c7f9e11c238vRzhJLeibOLR.jpg
20250822_3c1c29469d2dd1646f372T9wHdMXBnyo.jpg
cry.gif
biggrin.gif
20250822_ce4be7a538fc52cb0addgV95hjnbDGAx.jpg
20250822_0912950aa0d56badfe19MyQDuAsgaRaC.jpg
20250822_e04bcc0ba2e7c6af4629ksGpbHpdhaWJ.jpg
20250822_bbe9d8924cfc18785914DSajVldokKIn.jpg
廢話︰中佬每次出外旅行，都會趁機睇吓波，踢球/棒球都無所謂！本來今次大阪之後係預算睇三場波，不過日本球市似乎真係好好，出發前發現8月8日阪神虎嘅棒球，8月10日大阪飛腳嘅門票，網上開賣已經售罄，無奈地望門輕嘆！成個行程，最後機會就係大阪櫻花嘅主場比賽！
.
門票︰今次買呢一條票，難度都唔少，首先中佬當然係鐘情實體飛，如果現場有得賣飛係最好，不過鑑於大阪飛腳一開賣就賣晒，所以中佬都好緊張，想註冊一個J League ID，奈何無日本電話號同地址又攪唔到！於是唯一可以做係日日上櫻花個官網睇睇有無賣晒？最後昅到比賽日朝早都仲未賣晒，好彩！
去到球場之時剛剛都落雨，真係狼狽，去到第一眼見到係賣波衫嘅官方店，唔左搵右搵喇，立即攞手機出嚟Google Translate，見到位有牌的工作人員就立即遞比佢睇，小姐望完都可以用英文同中佬講球場嘅另一邊！一聽到佢咁講，中佬個心定晒！立即9秒9速度飛奔去另一邊，好快就俾中佬搵到售票處，依家只係得返三個位置可以揀，主隊打氣區，分劃位同自由席，另外就係客隊打氣區！呢三種飛都係3000円一張，再加500手續費！
對於呢一刻中佬嚟講，價錢唔係問題，反而中佬都有問，東西兩邊看台仲有無位，不過售票姐姐就話其他section已經賣晒！嚟到櫻花主場，當然係坐返主隊那一邊，不過球迷打氣區就有少少保留，因為一來係坐龍門後，睇波嚟講就唔算最理想，而且打氣區分分鐘要企足兩個鐘，以今日中佬嘅狀態有啲辛苦！不過唔理喇，買咗先算！
.
淀川製鋼櫻花體育場︰呢一個係一個規模比較細嘅專業足球場，資料顯示有25000位，但目測望落好似無咁多位！看台同草地距離同旺角場差不多，不過最有趣仲係上蓋嘅設計，因為佢並唔係四邊看台都有上蓋，而係客隊球迷區(南看台)，大鐘底下面嘅看台係完全無上蓋，結果今日開波前一場大雨，將新潟天鵝嘅打氣團淋到濕晒，真係多多少少有啲爆陰毒！
至於草面質素就真係無得彈，開場落咗兩個鐘，草面無積水，踢晒全場亦都無起「草」頭！或者因為咁櫻花今場地面推進無受落雨影響！
.
交通︰中佬今次嚟大阪，入住酒店喺新今宮駅附近，由呢一度去淀川製鋼櫻花體育場，交通十分方便，由新今宮駅出發，坐大阪環狀線一個站到天王寺，之後再轉阪和線，三個站就可以到球場！去到攻王寺駅時，由於距離開波已經唔夠兩個鐘，所以月台上已經有櫻花同天鵝嘅波衫！不過最估唔到係阪和線竟然係15分鐘一班車！要知依家係放工時間喎……Anyway，好快到鶴ケ丘駅，之後就簡單，只要跟住波衫走就可以！
.
入場︰入場前，外圍有好多food truck，只可惜因為今日落雨，都影響咗生意！雖然中佬手持係實體飛，不過入場前只係需要do 票上嘅 barcode就可以！
.
對賽隊伍：
大阪櫻花︰中佬近年無乜時間睇J League，所以對今時今日嘅大阪櫻花實力唔清楚，賽前大阪櫻花係排中游。球員基本上係唔識，唯一識嘅係近兩季由歐洲回歸J League嘅球星香村真司。
.
新潟天鵝︰唔睇都唔知，一睇嚇一跳！原來今季打咗廿幾場波，新潟天鵝竟然係包尾！近年好少睇日職，真係唔知發生咩事！？
.
比賽過程︰
上半場︰日職開波前就唔需要唱國歌，不過就要唱一唱櫻花隊隊歌！另外仲有一個默哀儀式，紀念早一天過世，日本足球名宿釜本邦茂。現場見到差不多係「座無虛席」，相對之後日本球市真係比韓國好好多！
開波後果然同中佬估計都一樣，主隊打氣區前排嘅球迷一直企起身一邊睇一打氣，中佬都只可以企起身睇！而環顧左右都無「吉位」俾中佬換，所以無計，頂硬上！
呢頭睇緊仲有無吉位，嗰頭新潟就已經開始進攻，最估唔到第一腳起腳中龍，就已經入網！開賽僅僅2分鐘，新潟就由31號射入領先一球！以前中佬去過好多球場，當主隊落後之時，打氣團點都會窒一窒，但櫻花打氣團完全唔當係一回事，同無事發生一樣繼續打氣！
一開波就領先，以為新潟會易打好多，點知踢落有啲一面倒，櫻花完全壓住新潟嚟踢，新潟只可以勉強負隅頑抗，不過守到唔失已經係萬幸，完全無機會打防反！而且可能時間尚早，櫻花就好有耐性去組織攻勢，三爬兩撥已經有接近嘅射門，去到13分鐘，櫻花就已經追平，13號禁區內射門，新潟守門員拍到個波，但唔知係個波太煽定係點，個波拍高咗仍然笠入，1:1！
去到16分鐘，一次角球解圍，櫻花16號禁區外嚟一腳遠射，穿過後防眼看必入之時，中柱彈出！到19分鐘之時，櫻花又一腳中龍，今次由48號射地波，新潟守門員今次就飛到接住。
連翻施射都唔能夠反超，櫻花都要回一回氣，但係呢段時間新潟仍然十分保守，基本上係901，唔多攻櫻花！咁早就希望守和？不過你又真係吹佢唔漲，雖然俾櫻花圍攻，但新潟又真係守得住上半場唔再失波！
總結上半場，呢一場係一場節奏好快嘅比賽，不過雙方強弱有啲明顯，照正路如果下半場無乜起色，櫻花應該可以反cup！而球員方而，中佬就覺得桉花嘅10號，13號同77號外援比較突出。
.
中場時間︰中佬終可以坐低休息一陣，由於之前未知買唔買到票，所以嚟球場之前有啲緊張，無食到嘢！依家已經差不多2000，距離午餐已經已6個鐘！真係有啲餓，只不過由於坐得好滿，一出一入都好麻煩，最後決定唔出去買嘢食......點知呢個時間，身邊兩位日本妹居然攞盒炸雞出嚟......唉！
.
下半場︰
下半場開波後，仍然保留上半場後段嘅形勢，櫻花攻，新潟守！如果形勢延續，櫻花今日可以執到三分的機會都高！50分鐘，櫻花48號又有一腳要新潟守門員孩盡先可以撲出底線嘅射門！俾人咁射法新潟應該唔頂得好耐！果然去到53分鐘，櫻花就反cup，19號喺禁區左邊切入，個波橫傳去尾柱俾從後殺上櫻花嘅77號，推順個波之後起腳......就係咁，櫻花反領先2:1！
之後嘅時間，櫻花當然會略為放慢，而新潟今季去到聯賽包尾，亦唔似係偶然，落後之下正常當然係要反攻，但新潟似乎谷唔起，即使換咗後備入場都完全組織唔到！反而櫻花整體上仍然壓住新潟，最少唔俾新潟有任何反攻機會！
去到80分鐘，呢一場波都總算係塵埃落定，櫻花放個波入禁區內，新潟25號喺急忙下同龍門誤會，個波撞中佢腳碌返入自己龍門，戰局改為3:1！呢個時間再輸一球烏龍波，再加上今日新潟嘅表現，應該神仙都難救！而大局已定之下，櫻花最後一個換人名額換入老將香村真司，算係滿足下冒雨前嚟睇波嘅球迷！之時時間加埋補時，新潟已經無力反攻，只係希望唔好再擴大比分！反而櫻花後備落場嘅球員有啲意猶未盡，希望再入波。大概十五分鐘嘅時間，仲不斷組織攻勢，最少仲有兩三腳射門！最後結果維持3:1完場！
.
完場後︰主隊球迷當然無立即走，而係睇埋球員過嚟謝幕。當然，中佬亦都見識到日本球迷自行清理垃圾。
.
入場人數︰18674人，當日中佬目測，除咗大鐘底嘅客隊打氣區外，其他區域基本上都係座無虛設！不過呢個場又唔似可以坐到2萬5千人！
.
全場最佳球員︰櫻花13號，前鋒中島元彥
.
雙方球迷︰
大阪櫻花︰由中佬行入看到之後，打氣聲基本上無停過，最恐怖仲係當佢哋一齊跳之時，擺動力度係大到石屎看台都可以出現震動狀況！好彩呢個球場嚟喺日本，本身一定要通過地震測試，如果喺印度，我驚連看台都冧埋！
.
新潟天鵝︰其實搭阪和線嚟球場之時，都有唔少新潟天鵝嘅fans，由於客隊打氣區南看台係無上蓋，所以當日佢哋都幾慘，肯定濕晒！目前所見南看台大概坐咗75~80%，新潟打氣團聲音都好大！
.
總結︰呢場波其實可以完完全全用優勝劣敗嚟形容，當然由於我對兩隊都唔熟，所以只係睇呢場波而評論！雖然新潟2分鐘就已經打開紀錄，但之後唔知係實力定係心態上太怕輸，完全俾櫻花撳住嚟踢，仲要13分鐘就已經被追平！雖然輸返1:1嗰球，新潟守門員都要負返一定責任，但係之後時間佢都做咗唔少撲救，櫻花亦都有一球中柱。而到下半場情況亦都無改變，下半場兩個入波都唔關守門員事，第二球77號後上完全無人mark，之後第三球就係急忙中再加個烏龍，就真係無得講！
雖然時間唔係好長，不過都可以見到老將香村真司落場，又係今日另一個bonus，話晒都係德甲，英超名將！
.
今次終於可以見識到J League嘅威力，好彩又得，辛苦又得，坐正嘅主隊打氣區，打氣聲好似拆天，中佬身邊兩位日本女球迷，跳足全場唔腳軟，真係堅！中佬開頭都未跟到個beat，不過下半場已經跟到六成！
當然會再入場睇J League，好似係今次望門輕嘆嘅大阪飛腳，兩支東京球隊等等！
.
賽後小插曲︰中佬帶住疲倦嘅步伐，行到去鶴ケ丘駅，竟然發現職員因為人潮管制，將向上嘅扶手電梯關咗！XYZ！仲要中佬撐三層樓高上月台？好在忽然俾我見到有電梯，如是等lift，等之時聽到熟悉的港式粵語，兩位香港球迷同中佬一齊等lift，短短一兩分鐘都交流吓，對方話頭先打氣啲歌好「洗腦」，啲打氣歌依家個腦中出現緊......
而中佬就話剛才在主隊球迷區，差不多企足全場，開頭唔熟個beat，聽多幾吓之後跟到，都一齊打埋一份氣，你聽我把聲(已經沙晒)就知......
[ 本帖最後由 十二月田猛臣 於 2025-8-22 06:00 編輯 ]
| 
發表於 2006-11-3 20:10
/3 